Vai al titolo

Spezialist / Spezialista d’hotellaria AFQ

Spezialists e spezialistas d’hotellaria surpiglian incumbensas multifaras en hotels: Els tegnan net chombras da giasts e locals da segiurn e lavuran en la distribuziun da la laschiva. Durant l’ensolver e tar banchets s’occupan els dals giasts ed a la recepziun sustegnan els ils collavuraturs.

Lavurs

Spezialists d’hotellaria guardan che giasts da vacanzas e giasts da seminaris sa sentian dal tuttafatg bain en lur hotel. Lur champ d’incumbensas cumpiglia il nettegiar e la tgira da chombras da giasts e da locals da segiurn, il s’occupar da giasts en il restaurant ed a la recepziun, la tgira da la laschiva e l’administraziun dal material.

En las chombras da giasts èn spezialists d’hotellaria responsabels per urden e nettezza. Els fan urden, emplainan la minibar, midan la laschiva, nettegian il bogn e fan cun il tschitschapulvra. Latiers dovran els meds da nettegiar      adattads. Per ils novs giasts preparan els fritgs u flurs. Era ils locals da segiurn nettegian els professiunalmain. Ultra da quai tgiran els plantas, fan decoraziuns e procuran per reparaturas.

Ultra da quai preparan spezialists d’hotellaria stanzas per seminaris e banchets. Els controlleschan, schebain ils meds d’agid tecnics ed ils utensils da scriver necessaris èn avant maun, arranschan maisas e sutgas en la furma giavischada e s’occupan da l’alimentaziun da pausa durant l’occurrenza.

Savens èn spezialists d’hotellaria responsabels per l’andament speditiv dal service d’ensolver. Els pinan il buffet d’ensolver e preparan las bavrondas tenor ils giavischs dals giasts.

Spezialists d’hotellaria sustegnan ils collavuraturs da la recepziun e beneventan ils giasts da l’hotel a moda curtaschaivla e servetschaivla. Els respundan dumondas e prendan encunter giavischs.

En la lavandaria da l’hotel tgiran spezialists d’hotellaria vestgadira da lavur e laschiva d’hotel. Els lavan, sientan e fan ora cun il fier cun maschinas modernas e dovran pressas da stirar spezialas. Els guardan che tut las textilias e la laschiva vegnian nettegiadas a temp ed a moda ecologica e favuraivla.

Spezialists d’hotellaria administreschan sper la laschiva er material sco products da nettegiar e victualias. Els empostan ils products necessaris, als controlleschan tar la furniziun ed als repartan sin las differentas partiziuns.

Talent d’organisaziun, flexibilitad ed abilitad da supportar squitsch è spezialmain dumandà en la hotellaria. Perfin sch’igl è fitg hectic u sch’i dat chaussas nunprevisas, ston spezialists d’hotellaria avair la survista e restar ruassaivels.

Scolaziun

Basa legala

Ordinaziun federala 7-12-2004 (stadi dal 1-1-2018)

Durada

3 onns

Furmaziun en la pratica

En in hotel (almain 35 emnas per onn)

Furmaziun en scola

Tut tenor chantun different: 1 di per emna a la scola professiunala u 2 curs professiunals interchantunals da mintgamai 5 emnas ad onn en in hotel da scola da hotelleriesuisse

Roms professiunals

  • economia da manaschi
  • organisaziun da manaschi
  • igiena, segirezza da la lavur e protecziun da la sanadad
  • logistica
  • accumpagnament dals giasts
  • decoraziun a l’intern
  • mantegniment da la valur
  • provediment da la laschiva
  • stabiliments, maschinas, apparats ed utensils
  • segunda lingua

Curs ordaifer il manaschi

Temas t.a.: alloschament e mantegniment da la valur; lavandaria; offis; accumpagnament dals giasts,  service e banchets; recepziun

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "spezialist / spezialista d’hotellaria AFQ"

Premissas

Furmaziun preliminara
  • scola populara terminada cun pretensiuns mediocras u autas
  • enconuschientschas da linguas estras èn d’avantatg
Pretensiuns
  • disposiziun pratica per lavurs d’economia da chasa
  • talent d’organisaziun
  • senn per l’urden
  • conscienza da servetschs
  • plaschair vi dal contact cun  carst-gauns
  • buna demananza
  • spiert da gruppa
  • abilitad da supportar squitsch e flexibilitad

Furmaziun supplementara

Curs

purschidas d’associaziuns professiunalas e da scolas professiunalas autas

Segund emprendissadi scursanì

spezialist/a da restaurant AFQ, spezialist/a gastronomia da sistem AFQ, cuschinier / cuschiniera AFQ

Examen professiunal (EP)

cun certificat professiunal: manader/a da sectur en hotellaria-economia da chasa, manader/a restauraziun, manader/a da gestiun, schef/fa da recepziun

Examen professiunal superiur (EPS)

manader / manadra dipl. hotellaria-economia da chasa, manader / manadra dipl. gastronomia da cuminanza, manader / manadra dipl. da restauraziun

Scola spezialisada superiura (SSS)

hotelier / hoteliera dipl. ustier / ustiera dipl. SSS

Scola auta spezialisada (SAS)

Bachelor of Science (SAS) in International Hospitality Management, Bachelor of Science (SAS) in Facility Management

Cundiziuns da lavur

Spezialists d’hotellaria lavuran en hotels cun manaschi d’entir onn u manaschi da stagiun. Il temp da lavur è per regla betg regular e collià cun servetschs da squadra, servetschs durant la saira e durant la fin d’emna. Tut tenor stagiun variescha il squitsch da lavur.

Spezialists d’hotellaria AFQ cun enconuschientschas da linguas estras e pratica professiunala èn tschertgads ed han bunas schanzas sco collavuraturs en il cader cun la furmaziun supplementara correspundenta entaifer la hotellaria.

Ulteriuras infurmaziuns

Hotelleriesuisse
Marketing & Verkauf Bildung
Monbijoustr. 130
3001 Bern
Tel: 031 370 41 11
URL: www.berufehotelgastro.ch

GastroSuisse
Nachwuchsmarketing
Blumenfeldstr. 20
8046 Zürich
Tel: 0848 377 111



orientamento.ch