Vai al titolo

Commerziant / Commerzianta AFQ

Lavurs

Commerziants e commerziantas AFQ exequeschan lavurs administrativas en manaschis publics e privats. Tut tenor sectur da lur patruns e la sort da lur engaschament varieschan lur incumbensas.  Els pon sa fatschentar cun correspundenza dal manaschi, cun la contabilitad (registrar cudeschaziuns, controllar pajaments), cun empustaziuns (prender encunter talas e tschentar quint), cun retschaiver clientella e far lavurs da secretariat.

Els exequeschan suandantas lavurs:

Correspundenza ed empustaziuns
  • retrair, sortir e reparter posta als collavuraturs correspundents
  • trametter spediziuns postalas
  • controllar, ordinar ed archivar brevs, datotecas, empustaziuns e rapports
  • scannar documents, per als spedir vinavant u administrar els electronicamain
  • scriver actas, rapports, protocols u correspundenza cun agid da notizias, registraziuns u dictats che pon er esser en linguatgs esters
  • respunder posta, p.ex. dumondas per infurmaziuns, purschidas u plazzas u confermas da l’incumbensa
Contabilitad
  • controllar quints ed als registrar
  • contar imports e tegnair uschè l’administraziun sin il stan actual
  • crear documents che stattan en connex cun l’entrada d’ina damonda, p.ex. quints cun la calculaziun da la taglia sin la plivalur e cun ils custs da spediziun, formulars da furniziun u da duana
  • examinar regularmain ils contos, quai vul dir da controllar ils imports pajads ed incassads cun agid da mussaments da cudeschaziun e d’ina software administrativa
  • trametter avis da pajament ed instradar la procedura d’incassament per quints betg pajads, quai vul dir in’interpresa vegn infurmada sch’insatgi na paja betg ses quint
Manar il secretariat
  • administrar il chalender per sesidas e termins
  • actualisar datas da banca sco register da clientella, empustaziun e furniturs
  • retschaiver clientella u visitaders
  • prender encunter telefonats ed elavurar e-mails
  • accumpagnar auters emprendists e praticantas
  • instruir commerziants AFP

Scolaziun

Durada

3 onns / 4 onns (SMC)

Profils

  • furmaziun da basa (profil B)
  • furmaziun da basa extendida (profil E) cun maturitad professiunala
  • midadas en in auter profil èn pussaivlas

Midada en in profil pli aut resp. pli bass è pussaivla.

Furmaziun en la pratica

En in manaschi d’emprendissadi ord las suandantas 19 branschas

Furmaziun en scola

  • 1-2 dus ad emna en ina scola professiunala

Roms professiunals

  • agir en furmas da lavur ed organisaziun agilas
  • interagir en in ambient da lavurar connectà
  • coordinar process da lavur d’interpresa
  • elavurar relaziuns cun clientella e da furniturs
  • duvrar tecnologias dal mund da lavur digital
  • enconuschientschas da professiun en il rom opziunal obligatoric: secunda lingua estra u lavur da project individuala
  • enconuschientschas da professiun specificas opziunalas: finanzas, tecnologia u communicaziun en la lingua d’instrucziun u en l’emprima lingua estra

Curs ordaifer il manaschi

Emprender ed exercitar a moda pratica la basa professiunala,  8-16 dis durant 3 onns

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Avis: emprendists da la branscha da bancas pon absolver la maturitad professiunala en rama dil model da furmaziun focus «KV BM».

Diplom

Commerziant / Commerzianta AFQ

Premissas

Furmaziun preliminara
  • temp da scola obligatoric terminà
  • intgins manaschis u scolas fan in examen d’admissiun
Pretensiuns
  • eloquenza a bucca ed a scrit
  • dun d’organisaziun
  • enconuschientschas da linguas estras
  • bun dun receptiv
  • senn da responsabladad
  • fidadadad
  • plaschair d’esser en contact cun carstgauns
  • flair per cifras

Furmaziun supplementara

Curs

purschidas da scolas professiunalas, centers per furmaziun supplementara sco era tar associaziuns professiunalas ed interprofessiunalas

Examen professiunal (EP)

cun certificat professiunal federal: spezialist / spezialista da finanzas e contabilitad, spezialist / spezialista da marketing, spezialist HR (resursas umanas), assistent / assistenta da direcziun, fiduziari / fiduziaria, assistent / assistenta da direcziun

Examen professiunal superiur (EPS)

Expert diplomà / experta diplomada en facturaziun e controlling, directur diplomà / directura diplomada da marketing, manader diplomà / manadra diplomada resursas umanas (RU/HR), manader diplomà / manadra diplomada da commerzi cun l’exteriur, fiduziari diplomà / fiduziaria diplomada per immobiglias

Scola spezialisada superiura (SSS)

Econom diplomà per fatgs bancars SSS, economa diplomada da manaschi SSS, econom diplomà d’assicuranzas SSS

Scola auta spezialisada (SAS)

Bachelor of Science (SAS) en economia da manaschi u en inschigneria d’economia. Tut tenor scola auta spezialisada valan differentas cundiziuns d’admissiun.

Cundiziuns da lavur

Las lavurs dals commerziants e las commerziantas AFQ varieschan tut tenor grondezza dal manaschi u da la branscha, p. ex. bancas, assicuranzas, transport u administraziun:  Els pon lavurar persuls en in pitschen manaschi ed exequir l’entira part administrativa u esser integrads en in grond manaschi e sa fatschentar cun incumbensas specificas. Els lavuran cunzunt al computer e lur temp da lavur è regulars.

Tut tenor branscha elegida ed enconuschientschas da linguas estras pon commerziants e commerziantas AFQ surpigliar differentas incumbensas en lur emprima plazza. Suenter intgins onn experientscha da lavur pon els sa spezialisar en tschertas spartas, p.ex. assicuranzas, banca, cussegliaziun finanziala, marketing, fatgs da persunal, vendita e management da products u turissem. Tut tenor con bain ch’els pon manar in team han els er la pussaivladad da surprender funcziuns da manar persunal. En quella professiun è lavur parziala fitg derasada.

Ulteriuras infurmaziuns

Kaufmännischer Grundbildung
3011 Bern
URL: www.kaufmaenische-grundbildung.ch

Kaufmännischer Verband
8021 Zürich 1
URL: www.kfmv.ch

SKKAB Schweiz. Konferenz der kaufmännischen Ausbildungs- und Prüfungsbranchen
3001 Bern
URL: www.skkab.ch



orientamento.ch