Lavurs
Informatichers ed informaticras da la direcziun svilup d’applicaziuns èn spezialists per software. Els realiseschan programs per novs products u per modifitgar proceduras e products existents. Per quai analiseschan els sco emprim ils giavischs dals incumbensaders e noteschan las pretensiuns al program. I po sa tractar da fitg differentas applicaziuns: sistems da diriger il traffic, indrizs da regulaziun per maschinas, automats da bigliets, sistems da navigaziuns, webshops u applicaziuns per exequir divers process da lavur en interpresas sco la contabilitad da pajas e l’administraziun dal material. Suenter l’examinaziun preliminara vegn in concept detaglià elavurà. Ils informatichers programmeschan la software, l’examineschan intensivamain e scoleschan alura ils utilisaders. Mintga pass da lavur vegn documentà per uschia segirar il support ed il svilup da l’applicaziun.
Informatichers da la direcziun tecnica da sistems èn responsabels per l’installaziun ed il mantegniment da sistems d’informatica. Els elegian la hard- e software adattada per ils incumbensaders. Alura installeschan els ils plazs da lavur cun squitschaders e servers. Els configureschan e dattan liber servetschs ed installeschan in backup regular per che naginas datotecas na giajan a perder. Per quai ston els enconuscher bain ils apparats e las applicaziuns che vegnan duvradas en lur fatschenta. Per segirar ch’ils sistems stettian adina a disposiziun als utilisaders quintan ils informatichers era cun variaziuns dal dumber d’utilisaders e cun augments d’access.
Informatichers da la direcziun informatica da manaschi sviluppeschan tut tenor patrun differents puncts centrals. Els examineschan programs e creeschan soluziuns pussaivlas cun agid da meds da l’informatica. Els preparan plazs da lavur cun computer cun installar hard- e software. Ultra da quai mettan els en funcziun ils servers e las raits da ICT (LAN, WLAN), las surveglian e sviluppeschan. Plinavant fan els attenziun da proteger las infurmaziuns e che questas pon vegnir transmessas segiramain. Els sustegnan utilisaders ed utilisadras sco era la clientella tar dumondas.
Scolaziun
Basa legala
Ordinaziun federala 1-11-2013
Durada
4 onns
Direcziuns
-
svilup d’applicaziuns
- tecnica da sistems
- informatica da manaschi
Furmaziun en la pratica
En in’interpresa da servetschs, en in’interpresa industriala / commerziala u en ina administraziun
Furmaziun en scola
A la scola professiunala, en media 2 dis per emna
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Variantas da furmaziun
Sper l’emprendissadi classic (cun ils trais plazs da lavur manaschi d’emprendissadi, scola professiunala e curs ordaifer il manaschi) vegn era purschì en singuls chantuns ina furmaziun en scola da quatter onns; per l’ina da scolas medias d’informatica chantunalas, per l’autra da scolas privatas.
Diplom
Attestat federal da qualificaziun "informaticher / informaticra AFQ"
Premissas
Furmaziun preliminara
- scola populara terminada
- fitg bunas prestaziuns en ils suandants roms: scienza natirala, matematica e lingua(s)
Pretensiuns
- abilitad da lavurar en in team
- capacitad da pensar logic ed abstract
- bun dun receptiv
- imaginaziun dal spazi
- buna capacitad da savair sa concentrar
- moda da lavur sistematica
- pazienza e persistenza
- bunas enconuschientschas d’englais
- Per regla quintan ils manaschis d’emprendissadi ch’ils interessents fetschian in test da basa per eruir, sch’els adempleschan las premissas.
Furmaziun supplementara
Curs e seminaris
Purschidas da scolas professiunalas e da scolas spezialisadas superiuras, da scolas autas, da diversas associaziuns professiunalas sco era da furniturs da programs e da hardware
Examen professiunal (EP)
cun certificat professiunal federal: sviluppader / sviluppadra d’applicaziuns dad ICT, tecnicist / tecnicista per sistems e raits dad ICT, informaticher / informaticra en economia, mediamaticher / mediamaticra
Examen professiunal superiur (EPS)
manager dad ICT diplomà / managera dad ICT diplomada
Scola spezialisada superiura (SSS)
Furmaziuns en il sectur d’informatica, p.ex. informaticher / informaticra en economia SSS, tecnicist informatica SSS etc.
Scola auta spezialisada (SAS)
Furmaziuns en il sectur d’informatica, p.ex. Bachelor SAS en informatica, Bachelor SAS en informatica en economia
Cundiziuns da lavur
Informatichers lavuran en interpresas da servetsch, interpresas industrialas e commerzialas sco era en administraziuns publicas. Plazzas en il sectur da servetsch porschan tranter auter bancas, assicuranzas e firmas da software.
Informatichers han ina basa solida per sa perfecziunar cun ina furmaziun supplementara cuntinuanta. Sin la fiera da lavur per spezialists han els bunas schanzas. La dumonda suenter plazzas d’emprendissadi è gronda. Sulettamain annunzias engaschadas e fundadas han ina schanza.
Ulteriuras infurmaziuns
ICT-Berufsbildung Schweiz
Geschäftsstelle
Aarbergergasse 30
3011 Bern
Tel: 058 360 55 50
URL: www.ict-berufsbildung.ch
URL: www.it-dreamjobs.ch