Lavurs
Lur lavurs èn las suandantas:
Installaziun, messa en funcziun e mantegniment
- installar e configurar apparats sco computers, stampaders, tablets e smartphones sco er sistems operativs, e quai tenor las directivas da l'interpresa, per exempel per drizzar en in nov plaz da lavur
- tgirar e controllar hardware
- installar, configurar ed actualisar software ed applicaziuns
- adattar la hardware, la software u la rait, per exempel engrondir l'arcun, agiuntar ina carta da rait u prolungar la durada da l'accumulatur
- sviluppar plans da tests, far tests e documentar ils resultats, sche necessari, schliar problems
Projects ed analisas
- cooperar a projects che pertutgan l'infrastructura da la tecnologia d'infurmaziun e da communicaziun d'ina interpresa, per exempel per dischlocar ina partiziun entaifer ina interpresa
- planisar incumbensas e pass da lavur
- controllar, sche apparats, applicaziuns e servetschs pon vegnir integrads ed èn cumpatibels cun ils conturns dad IT da l'interpresa
Rait e segirezza
- colliar cun la rait unitads ed apparats periferics (per exempel computers desktop, laptops u stampaders) sco er servetschs sco servers u clouds
- eliminar disturbis u trametter vinavant problems ad in spezialist
- proteger apparats cun agid da tools da segirezza sco firewalls e programs antivirus
- determinar reglas da segirezza per ils utilisaders, per exempel en cas d'emprovas da phishing
Support dals utilisaders ed incumbensas administrativas
- scolar e gidar las utilisadras ed ils utilisaders tar l'introducziun da tools e d'applicaziuns dad ICT, las ed als infurmar davart la segirezza e davart la protecziun da datas
- elavurar instrucziuns da diever, videos d'emprender, preschentaziuns e glistas da controlla, per part er en englais
- helpdesk: en cas da problems sustegnair las utilisadras ed ils utilisaders per telefon u al lieu, schliar il cas independentamain u en il team ubain al trametter vinavant ad ina spezialista sche necessari
- elavurar incumbensas administrativas ed empustaziuns da hardware
- eruir ils basegns da la clientella e la cussegliar tar l'acquisiziun d'apparats ICT
Scolaziun
Durada
3 onns
Furmaziun pratica
en in manaschi da servetschs, d'industria u da mastergn ubain en l'administraziun
Furmaziun en scola
en la scola professiunala spezialisada, 1 fin 2 dis per emna
Furmaziun da scola a temp cumplain
diversas scolas en la Svizra tudestga, guardar Scolaziuns
Cuntegns didactics
- metter en funcziun apparats d'utilisaders dad ICT
- garantir il funcziunament da meds dad ICT
- sustegnair las utilisadras ed ils utilisaders
- planisar, organisar e reglar dumondas da support ICT
Curs ordaifer il manaschi
Emprender la lavur pratica, approfundar ed exercitar las basas professiunalas, 24 dis durant 3 onns
Maturitad professiunala
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Spezialist / Spezialista dad ICT AFQ
Premissas
Furmaziun preliminara
- terminà la scola obligatorica
- Intginas interpresas u scolas pretendan tests da qualificaziun
Pretensiuns
- chapientscha tecnica
- interess per svilups tecnologics
- moda da lavurar sistematica
- abilitad da communitgar
- exactadad e quità
- abilitad da lavurar en in team
- pensar abstract e logic
- plaschair da contacts e buna demananza
Furmaziun supplementara
Curs
purschidas da scolas professiunalas e da scolas spezialisadas, da scolas autas, da differentas federaziuns professiunalas sco er da furniturs da soft- e da hardware
Emprendissadi supplementar
Spezialistas e spezialists dad ICT AFQ pon per regla far in emprendissadi scursanì sco Informaticher / Informaticra AFQ.
Examen professiunal (EP)
Cun attestat professiunal federal, per exempel:
- ICT-Application Development Specialist
- ICT-Platform Development Specialist
- Informaticher / Informaticra d'economia
- Cyber Security Specialist
- Digital Collaboration Specialist
- AI Business Specialist
- Multimedia Content Creator
Examen professiunal superiur (EPS)
Cun diplom federal, per exempel:
- Manager / Managera dad ICT dipl.
- Information Security Manager dipl.
Scola spezialisada superiura (SSS)
Scolaziuns en secturs spezials parentads, per exempel Informaticher / Informaticra d'economia SSS Informaticher / Informaticra SSS
Scola auta spezialisada (SAS)
Studis en secturs parentads, per exempel bachelor of science en informatica u en informatica d'economia. Tut tenor la scola auta spezialisada valan differentas cundiziuns d'admissiun.
Cundiziuns da lavur
Spezialistas e spezialists dad ICT lavuran sulets ed en teams. Ellas ed els han savens contact cun collavuraturs da lur interpresa, cun utilisadras u cun clientella. A questas persunas dattan ellas ed els sustegn independentamain u ensemen cun auters spezialists. Lur temps da lavur èn da princip regulars.
Spezialistas e spezialists dad ICT pon lavurar en tut las branschas economicas, per exempel en manaschis da servetsch, d'industria e da commerzi u en il servetsch public. Ellas ed els lavuran sin ils champs support tecnic u vendita, e quai entaifer ina interpresa u tar in furnitur extern da servetschs dad ICT. Spezialistas e spezialists dad ICT ston permanentamain s'infurmar davart las novaziuns dals apparats e da las applicaziuns dad ICT, per las integrar en lur lavur quotidiana.
Ulteriuras infurmaziuns
ICT-Furmaziun professiunala
3011 Bern
URL: www.ict-berufsbildung.ch