Lavurs
Lur lavurs èn las suandantas:
Preparar lavurs d'installaziun
- elavurar documentaziuns tecnicas per indrizs electrics
- preparar e, sche necessari, empustar material ed utensils
- depositar material sin il plazzal
- garantir e mantegnair il provediment d'electricitad sin il plazzal
- determinar a maun dals plans, nua che bischlas da contact, clavellas u stgaffas d'interrupturs vegnan installads
Installar apparats e sistems
- metter e francar bavrolas da lingias avant che paraids, palantschieus sura u palantschieus vegnan terminads
-
metter cabels, colliar bischlas da contact, clavellas e stgaffas d'interrupturs resguardond las prescripziuns da segirezza
installar e metter en funcziun apparats e sistems electrics
- installar elements per l'automatisaziun d'edifizis, p.ex. per regular la glisch e la temperatura
- installar sistems da communicaziun per l'internet u per multimedia
- installar elements per sistems d'energia electrica sco indrizs solars
- installar indrizs da la tecnica da segirezza sco indrizs d'alarm d'incendi u illuminaziuns d'urgenza
Terminar e mantegnair installaziuns electricas
- far l'emprima controlla da las installaziuns electricas e metter en funcziun quellas
-
configurar cun apparats da mesiraziun la tensiun, l'intensitad e la prestaziun dal currernt
en cas da disturbis discurrer cun l'incumbensadra u cun l'utilisader per eruir il sbagl
- far mesiraziuns e tests per chattar ils eventuals motivs dals disturbis u sbagls
- reparar u barattar ora installaziuns ed apparats defects
- surdar las installaziuns a l'incumbensadra u a l'incumbensader
- scriver rapports davart las lavurs liquidadas
Scolaziun
Durada
4 onns
Furmaziun pratica
En ina firma d'installaziuns electricas.
Furmaziun en scola
1 fin 2 dis per emna en la scola professiunala spezialisada
Roms professiunals
- organisar lavurs d'installaziun
- integrar installaziuns electricas en la construcziun brutta
- installar indrizs electrics
- installar tecnica d'edifizis
- furnir servetschs
- terminar l'installaziun electrica
Curs ordaifer il manaschi
Emprender, approfundar ed exercitar las basas professiunalas, 48 dis durant 4 onns.
Maturitad professiunala
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Electroinstallatur / Electroinstallatura AFQ
Premissas
Furmaziun preliminara
- terminà la scola obligatorica
- bunas prestaziuns en geometria, matematica e fisica
- tscherts manaschis pretendan tests da qualificaziun
Pretensiuns
- inschign manual
- pensar abstract e logic
- gronda chapientscha tecnica
- moda da lavurar exacta e conscienziusa e senn da responsabladad
- nagin disturbi da vesair colurs: las colurs dals cabels ston pudair vegnir differenziadas
- abilitad da lavurar en in team
- demananza curtaschaivla, abilitad da communitgar
Furmaziun supplementara
Curs
purschidas dad EIT.swiss, d'ulteriuras federaziuns professiunalas, da scolas professiunalas spezialisadas e d'instituts tecnics
Emprendissadi supplementar
Electroinstallaturs / Electroinstallaturas pon far per regla in emprendissadi scursanì sco Electroplanisader / Electroplanisadra
AFQ.
Spezialisaziun
Per exempel Manader / Manadra da team electro cun certificat EIT.swiss u Electricist / Electricista da manaschi (examen da l'Inspecturat federal d'installaziuns a current ferm ESTI)
Examen professiunal (EP)
Per exempel Electricist / Electricista mainaproject installaziun e segirezza cun certificat professiunal federal ubain Manader / Manadra da project telematica cun certificat professiunal federal
Examen professiunal superiur (EPS)
Per exempel Expert / Experta dipl. d'installaziun e segirezza electrica, Expert / Experta dipl. d'electroplanisaziun u Telematicher / Telematicra dipl.
Scola spezialisada superiura (SSS)
Scolaziuns en secturs spezials parentads, per exempel Electrotecnicist / Electrotecnicista dipl. SSS u Tecnicist /Tecnicista da telecommunicaziun dipl. SSS
Scola auta spezialisada (SAS)
Per exempel bachelor of science en electrotecnica u en tecnica d'edifizis / energia. Tut tenor la scola auta spezialisada valan differentas cundiziuns d'admissiun.
Cundiziuns da lavur
Electroinstallaturas ed electroinstallaturs lavuran en pitschens teams sin plazzals e sa coordineschan cun mastergnants d'auters manaschis. Savens mainan ellas ed els teams e projects d'installaziun en collavuraziun cun electricistas ed electricists da montascha. A chasa tar la clientella lavuran ellas ed els savens persuls. Las uras da lavur èn per il pli regularas, tut tenor il lieu da lavur resultan dentant er servetschs da pichet e da notg u lavur da fin d'emna.
Electroinstallaturas ed electroinstallaturs lavuran en firmas d'installaziuns electricas, en manaschis industrials, en ovras electricas u en il commerzi a l'engrossa d'electromaterial. Indrizs electronics e tecnologics èn centrals per l'economia e per la societad. Spezialistas e spezialists da questa branscha èn perquai dumandads sin il martgà da lavur. Cun ina furmaziun supplementara ed experientscha correspundenta èsi pussaivel da sa spezialisar per tscherts geners d'installaziun, da surpigliar ina posiziun da responsabladad u da manar in'atgna firma d'electroinstallaziuns.
Ulteriuras infurmaziuns
EIT.swiss
8005 Zürich
Tel: +41 44 444 17 17
URL: www.eit.swiss