Lavurs
Serreras e serrers da vehichels construeschan, monteschan e repareschan berts e surconstrucziuns per autobus, autos da pumpiers, vehichels cun schelenteras e sumegliant. Els reconstrueschan ils vehichels tut tenor l’intent d’utilisaziun ed als equipeschan cun installaziuns da cranas e cupitgas, auzaders, portabagaschas, euv. Els resguardan las prescripziuns tecnicas ed ils giavischs e basegns individuals da la clientella.
Il material da lavur il pli impurtant dals serrers da vehichels è il metal. Cun differents proceders d’elavurar furman els tolas, bischens e profils tenor ils giavischs: els als defurman tras storscher, stender e smatgar ensemen. Els taglian, resgian e foran tocca en elavuraziun e buglian, lutegian u rebattan quella. Per quai als stattan a disposiziun guaffens, ma era maschinas modernas. Adina pli savens dovran ins era materia sintetica. Ils lavurers enconuschan las caracteristicas spezialas da las materialias utilisadas.
Serrers da vehichels legian schemas da montascha e dissegns tecnics. Els dovran ils plans sco model da lavur per fabritgar surconstrucziuns. Els cumenzan cun l’armadira che dat furma e stabilitad al vehichel. Vi da quel monteschan els la tocca preparada. Vi da las surconstrucziuns u surfatschas da chargiar monteschan els aissas da lain u da metal, fan modificaziuns vi dal bert e vi dal paralozza ed equipeschan il vehichel cun material supplementar sco chaschas d’utensils, fixaziuns u lampas. Mintgatant cumponan els er entirs implants idraulics u installeschan indrizs d’aria cundiziunada.
Era lavurs da mantegniment e reparaturas fan part da las incumbensas dals serrers da vehichels. Els procuran per la protecziun da corrusiun, fan tests da funcziun, controlleschan l’idraulica da cranas u ils sistems da manischadi e da frain da chars annexs. Tocca donnegiada u isada vegn remplazzada tras nova. Serrers da vehichels lavuran persuls u en in team. La lavur cun maschinas, equipaments e guaffens è colliada cun in privel d’accident. Perquai ston serrers da vehichels resguardar conscienziusamain las prescripziuns davart la segirezza, la sanadad e la protecziun da l’ambient.
Scolaziun
Basa legala
Ordinaziun federala 25-8-2009
Durada
4 onns
Furmaziun en la pratica
En in manaschi da construcziun da vehichels u en in lavuratori da carossaria
Furmaziun en scola
1 di l'emna a la scola professiunala
Roms professiunals
- Basa tecnica (quints / fisica, electrotecnica
- instrucziun da materials
- proceders da fabricaziun)
- basas dal manaschi (teoria da manaschi, plaz da lavur, prescripziuns)
- tecnica da vehichels (electrica / electrotecnica, pneumatica, idraulica, propulsurs, dinamica da vehichels)
- fabricaziun e mantegniment (dissegn, bert, construcziun dal vehichel)
Curs ordaifer il manaschi
emprender ed exercitar en la pratica las basas professiunalas
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "serrer / serrera da vehichels AFQ"
Premissas
Furmaziun preliminara
- scola populara terminada
- bunas prestaziuns en quints, geometria e dissegn tecnic
Pretensiuns
- grond inschign manual
- senn da visualisaziun spaziala
- forza corporala
- senn da responsabladad
- moda da lavurar exacta e conscienziusa
- abilitad da lavurar en ina gruppa
Furmaziun supplementara
Curs
Purschidas da scolas professiunalas e da l'Uniun svizra da la carossaria
Examen professiunal (EP)
serrer / serrera da vehichels cun certificat professiunal federal, spezialist / spezialista cun certificat professiunal federal
Examen professiunal superiur (EPS)
Mainagestiun da carossaria diplomà / diplomada
Scola spezialisada superiura (SSS)
p.ex. tecnicist diplomà / tecnicista diplomada SSS construcziun da metal
Scola auta spezialisada (SAS)
p.ex. Bachelor of Science (SAS) en tecnica d’automobils
Spezialisaziun
sco expert / experta dal donn, furmaziun supplementara en ina cumpagnia d’assicuranzas
Cundiziuns da lavur
Serrers da vehichels lavuran en manaschis da carossaria e da la construcziun da vehichels. I sa tracta per la pli gronda part da manaschis pitschens u mesauns che produceschan e repareschan vehichels per il transport commerzial da persunas e da vitgira.
Ulteriuras infurmaziuns
carosserie suisse
Forstackerstr. 2B
4800 Zofingen
Tel: +41 62 745 90 80
URL: www.carrosseriesuisse.ch
Revista professiunala:
"Carrossier"