Lavurs
Tecnologs e tecnologas d’emballadi fan emballadis industrials da tuttas sorts. Quai po esser emballadis per victualias, stgatlas da parfum, stgatlas per medicaments u er displays da vendita che vegnan plazzads en supermartgads per preschentar ils products. Tecnologs d’emballadi vegnan scolads tut tenor manaschi en l’accent chartun u chartun ondulà. Là lavuran els tut tenor preferenza plitost en il svilup d’emballadi u en las partiziuns da producziun.
En il svilup d’emballadi creeschan tecnologs d’emballadi novs emballadis tenor ils giavischs da la clientella. Els elegian il chartun ondulà u la sort chartun adattà e produceschan in prototip. Ils giavischs da la clientella u atgnas ideas per designs d’emballadi vegnan malegiads cun agid da CAD vi dal computer ed/u sviluppads a maun. Suenter avair discutà cun ils incumbensaders optimeschan els l’emballadi che sto ademplir criteris stricts: per la preschentaziun sto el esser uschè attractiv sco pussaivel, per il diever sto el esser funcziunal, per la magasinaziun e per il transport duess el esser pratic e per la producziun al ston ins pudair producir economicamain. L’emballadi vegn meglierà uschè ditg, enfin ch’el va a prà il meglier cun il product correspundent.
Per la planisaziun da la producziun lavuran tecnologs d’emballadi stretgamain cun la direcziun da la producziun. Els preparan ils documents da lur lavur uschia ch’ins po duvrar els per la producziun en seria. Per ch’i dettia tar las artgas da punschar il pli pauc rument, calculeschan els co arranschar il meglier ils models.
En la producziun vegnan emballadis producids il pli savens en grond dumber. Tut tenor basegn vegnan las artgas da chartun stampadas u betg stampadas squitschadas, stanzadas, faudadas, tagliadas si, tatgadas u ch’i vegn fatg chavas. En il decurs da la tecnologisaziun èn ils pass da lavur manuals vegnids pli e pli automatisads. Ils tecnologs d’emballadi drizzan en ils indrizs da producziun dirigids dal computer a moda professiunala. Els dirigian ils indrizs fitg moderns, surveglian il process da producziun ed intervegnan immediatamain tar disturbis u qualitad manglusa. Suenter la producziun reorganiseschan els las maschinas e las mantegnan.
Scolaziun
Basa legala
Ordinaziun federala 12-7-2007 cun midada 1-11-2009
Durada
4 onns
Accents
- chartun
- chartun ondulà
- En ils accents vegn elegì en il 4. onn da scolaziun da basa ina da las duas approfundaziuns:
- svilup d’emballadi
- producziun
Furmaziun en la pratica
En in manaschi da l’industria da chartun u chartun ondulà
Furmaziun en scola
1 di per emna a la Scola d’art applitgà Aargau
Roms professiunals
- svilup d’emballadi (incl. Informatica)
- material
- preparaziun tecnica da la lavur
- producziun
- qualitad, segirezza, igiena e protecziun da l’ambient (incl. basa da las scienzas natiralas)
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "tecnolog / tecnologa d’emballadi AFQ"
Premissas
Furmaziun preliminara
- scola populara terminada
- bunas prestaziuns en dissegn tecnic, geometria ed informatica è d’avantatg
Pretensiuns
- buna imaginaziun en il spazi
- enclegientscha tecnica
- pensar logic
- senn per furmas e colurs
- moda da lavurar exacta
- inschign manual
- abilitad d’avair la survista dals pass da lavur
Furmaziun supplementara
Curs
purschidas da scolas professiunalas ed associaziuns professiunalas
Examen professiunal (EP)
commerziant / commerzianta da tipografia cun certificat professiunal federal, spezialist / spezialista da manaschi tecnologia da squitsch e d’emballadi cun certificat professiunal federal
Examen professiunal superiur (EPS)
packing manager / packing managera cun diplom federal, manager / managera da publicaziun cun diplom federal (DF), manader / manadra da fatschenta cun diplom federal
Scola spezialisada superiura (SSS)
tecnicist / tecnicista dipl. SSS medias, creader / creadra dipl. SSS design da product
Scola auta spezialisada (SAS)
cun furmaziun preliminara correspundenta
- en Svizra: p.ex. Bachelor of Science (SAS) en inschigneria da medias, Bachelor of Arts (SAS) en design da product ed industria
- en Germania: Bachelor of Engineering en tecnica d’emballadi, Master of Engineering in Packaging Technology (studi da cooperaziun Svizra - Germania)
Cundiziuns da lavur
Tecnologs d’emballadi lavuran en manaschis industrials da l’elavuraziun da chartun resp. chartun ondulà. Per regla sa spezialiseschan els en in dals secturs svilup d’emballadi u producziun.
Tecnologs d’emballadi èn conresponsabels per l’observaziun da las autas pretensiuns da la tecnica d’emballadi pertutgant qualitad, protecziun da l’ambient, segirezza ed igiena. Els èn plinavant abels da supportar squitsch, cunquai ch’els ston quintar da far lavur en squadra.
Las schanzas da chattar ina plazza d’emprendissadi èn relativamain bunas.
Ulteriuras infurmaziuns
Verband der Schweizer Druckindustrie VSD
3006 Bern
Tel: 031 351 15 11
URL: www.vsd.ch
IGB Interessengemeinschaft Berufsbildung
3006 Bern
Tel: 031 356 14 53
URL: www.verpackungstechnologe.ch
Schule für Gestaltung Aargau
5000 Aarau
Tel: 062 834 40 40
URL: www.sfgaargau.ch
Revistas professiunalas:
"Viscom print & communication"
"Pack aktuell"