Lavurers e lavureras da betun construeschan products da betun en interpresas da producziun. Quests products da betun vegnan duvrads tranter auter en la  construcziun d’abitaziuns, construcziun d’edifizis da mastergn, construcziun bassa, construcziun da punts, orticultura, construcziun da stadions, construcziun da tunnels u sco protecziun cunter canera. Exempels per products èn bischens da chanalisaziun, crappa per miraglia, crappa da cumbinaziun e da salaschada, plattas da curtin, stgalas, balcuns, balustrada, vau da lift u plattas d’acustica.

Per construir elements da betun prefabritgads vegnan duvradas las furmas negativas. Quellas vegnan fatgas dals lavurers ord tavlas da lain. Els sa tegnan vi dals plans da construcziun dals incumbensaders. Tut tenor product dovran els er furmas prefabritgadas d’atschal, da material sintetic u da betun. Pli e pli vegnan utilisads en ils implants da betun indrizs cumplainamain automatics che vegnan dirigids da computers. Lavurers da betun dovran questas maschinas e las mantegnan.

Tocca che sto esser fitg stabila vegn rinforzada cun atschal. Uschia obtegnan p.ex. pitgas da betun or da motivs statics in’armadira da bastuns d’atschal ed entretschaments da fier. Lavurers da betun fixeschan questa armadira tenor plan en l’entulada avant che derscher en la maschaida da betun.

Lavurers da betun maschaidan il betun tut tenor product cun differents recepts. Els calculeschan las relaziuns quantitativas da las substanzas supplementaras, las paisan e las doseschan. Els emplainan las ingredienzas en la betuniera e controlleschan regularmain la qualitad da la massa da betun.

Lavurers da betun derschan la massa da betun en la furma e la cumpriman cun scurlattar, smatgar, pressegiar e centrifugar. Cura ch’il betun è dir, allontaneschan els l’armadira da betun e nettegian il material d’entulada. Tut tenor product perfecziuneschan els la surfatscha, p.ex. cun mular, pulir, lavar a moda speziala u cun sablunar. Per part transportan els sezs ils products da betun tar il plazzal, als monteschan u als tschentan al lieu.

Per tractar la surfatscha sco er per auters pass da lavur dovran lavurers da betun numerus apparats e maschinas. Quellas na vegnan betg mo duvradas a moda professiunala, mabain era mantegnidas e tgiradas.