Lavurs
Pumiculturs e pumiculturas produceschan principalmain maila e paira. Latiers vegnan cultivads tenor regiun e manaschi tschareschas, primblas, persics u apricosas sco era differentas sorts da pumaraida. Las persunas spezialisadas mettan differents accents: u ch’els deponan, elavuran e vendan sezs lur products ni ch’els cumpletteschan il manaschi cun in’apicultura u ina plantera.
Per planisar las èras da puma e da pumaraida ston ils pumiculturs pensar al futur. Per garantir in aut gudogn elegian els lieus e sorts adattads sco era ina buna tecnica da producziun. Suenter la planisaziun cumenzan els cun la plantaziun e taglian e tgiran las plantas regularmain. Els enconuschan ils divers terrens e san cultivar els a moda correcta. Regularmain controlleschan els l’entir areal.
En armonia cun la natira lavuran ils pumiculturs a moda ecologica: Els s’occupan da la fritgaivladad dal terren, sa servan da plantas fructifitgantas e masainas e sauan, ladan e tgiran la cultivaziun. Cunzunt ils pumiculturs biologics èn sa spezialisads da lavurar a moda ecologica e persistenta e da mantegnair la gronda varietad da las specias. Igl è era impurtant d’utilisar ina protecziun da las plantas efficazia ed ecologicamain gista. Pumiculturs guardan ch’ils animals utils han bunas cundiziuns da viver ed eviteschan infestiun e malsognas.
Per obtegnair ina buna racolta cun fritgs d’auta qualitad allontaneschan ils pumiculturs la fritga ch’è danvanz durant la stad. En cas da basegn monteschan els raits da granella e sustas. Durant la racolta clegian els la fritga, zavran, pacheteschan e magasineschan ella. Perquai ch’ils fritgs ston vegnir racoltads ed elavurads ad uras èsi impurtant da planisar bain la stagiun auta. Ulteriurs lavurants vegnan savens engaschads durant la stagiun auta.
Pumiculturs dovran maschinas ed indrizs ch’els mantegnan e repareschan sezs. Lavurs sco tagliar plantas, selecziunar ils fritgs d’auta qualitad vi da la planta u racoltar las coclas fan els però a maun. Tar la controlla regulara sto vegnir luvrà cun gronda exactadad: cun ina marella dumbran las persunas da professiun parasits ed animals utils sin la feglia e deduceschan uschè il stadi da sanadad da la planta. Pumiculturs resguardan las prescripziuns da protecziun da segirtad e protegian l’ambient sco era l’atgna sanadad.
Scolaziun
Basa legala
Ordinaziun federala 8-5-2008
Durada
3 onns
Furmaziun en la pratica
En almain dus manaschis da pumicultura
Furmaziun en scola
A Strickhof, Lindau
1. + 2. onn: 1 di per emna
3. onn: 2 dis per emna
Roms professiunals
cultivaziun da plantas (cultivar il terren; semnar e plantar, nutrir, tgirar e racoltar puma; magasinar ed elavurar ils products; vender ils products), mecanisaziun ed indrizs tecnics (utilisar cumpetentamein ils materials, installar e mantegnair maschinas ed indrizs, utilisar e mantegnair edifizis e endrizzaments), ambient da lavur, roms d’elecziun
La furmaziun da basa po era vegnir absolvida cun l’accent principal sin la pumicultura biologica.
Curs ordaifer il manaschi
segirtad da lavur e protecziun da la sanadad, igiena e garanzia da la qualitad, diever da vehichels cun indrizs d’auzar e diever d’utensils per proteger las plantas, cultivaziun da plantinas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "pumicultur / pumicultura AFQ"
Premissas
Furmaziun preliminara
- scola populara terminada
- permiss dad ir cun tractor (sche pussaivel avant che cumenzar la furmaziun da basa)
- cun in attest federal professiunal en in mastergn agricul (AFP), cun in attest federal da qualificaziun (AFQ) en in auter mastergn u cun il diplom da maturitad sa scursanescha per regla la scolaziun per daventar pumicultur / pumicultura AFQ sin 2 onns
- cun in attest federal da qualificaziun (AFQ) en in auter mastergn agricul po la scolaziun per daventar pumicultur / pumicultura AFQ sa scursanir sin 1 onn
Pretensiuns
- plaschair da lavurar sut tschiel avert
- sanadad robusta
- perseveranza e resolutezza
- enclegientscha per ils connexs en la natira
- enclegientscha tecnica, bun dun d’ir enturn cun maschinas ed indrizs
- inschign manual
- senn da responsabladad
Furmaziun supplementara
Curs
Purschidas dal Strickhof, Au ZH, der ZHAW, Wädenswil e da posts spezialisads chantunals e da centers agriculs da furmaziun
Furmaziun da basa scursanida
Suenter avair terminà la furmaziun da basa po vegnir absolvì ina furmaziun da basa scursanida dad 1 onn en ina autra professiun agricula.
Examen professiunal (EP)
mainagestiun da pumicultura u d’agricultura cun certificat professiunal federal u in auter examen professiunal sin il champ da l’agricultura, spezialist / spezialista da commerzi en detagl cun certificat professiunal federal
Examen professiunal superiur (EPS)
maister pumicultur / maistra pumicultura , maister pur / maistra pura u in auter examen professiunal superiur dal champ professiunal agricultura
Scola spezialisada superiura (SSS)
agrotecnicher / agrotecnicra dipl. SSS, commerziant agricul / commerzianta agricula SSS
Scola auta spezialisada (SAS)
Bachelor of Science (SAS) en agronomia, Bachelor of Science (SAS) en inschigneria da l’ambient (p.ex. approfundaziun puresser biologic ed orticultura)
Cundiziuns da lavur
Pumiculturs lavuran en manaschis da pumicultura e da propagaziun, en planteras, tar societads cooperativas purilas u en commerzis da puma. Cun ina furmaziun supplementara correspundenta pon pumiculturs era lavurar en la perscrutaziun u en la cussegliaziun.
I dat paucas plazzas d’emprendissadi.. Spezialists cun ina buna furmaziun èn fitg tschertgads.
Ulteriuras infurmaziuns
OdA AgriAliForm
c/o Schweiz. Bauernverband
Laurstr. 10
5201 Brugg AG
Tel: 056 462 54 30
URL: www.agri-job.ch
Strickhof Lindau
8315 Lindau
Tel: 052 354 98 11
URL: www.strickhof.ch
Schweizer Obstverband SOV
Baarerstr. 88
Postfach 2559
6302 Zug
Tel: 041 728 68 68
URL: www.swissfruit.ch
Revistas professiunalas:
"Schweiz. Zeitschrift für Obst- und Weinbau"
"Schweizer Obst"