Pagina iniziale miOriento

Interessi e caratteristiche personali - Passo 1: Prendo conoscenza dei miei interessi e delle mie caratteristiche personali

Professioni e formazioni - Passo 2: Esploro le diverse professioni e formazioni

Caratteristiche personali e abilità - Passo 3: Confronto i miei interessi e le mie caratteristiche personali con le abilità richieste dalle professioni e formazioni

Stage d'orientamento - Passo 4: Svolgo degli stage d'orientamento per scoprire qual è la professione più adatta a me

Esaminare e prendere una decisione - Passo 5: Esamino i mestieri e le formazioni per elaborare il mio progetto formativo

Tirocinio in azienda o scuola a tempo pieno - Passo 6: Metto in pratica la mia decisione: cerco un posto di tirocinio o mi iscrivo ad una scuola

Prepararsi per la nuova formazione - Passo 7: Mi preparo alla nuova formazione o valuto se optare per una soluzione transitoria

Cartella di lavoro - I tuoi risultati

Per favore attendere...

miOriento sta caricando.

Disconnesso

La sua sessione di lavoro è finita. Verrà reindirizzato sulla pagina iniziale. Si connetta nuovamente per continuare la sessione.

Pur / Pura AFQ

Purs e puras mainan bains purils e tgiran il terren agricul. Els plantan plantas e/u tgiran animals per la producziun da charn, latg u ovs.

Lavurs

L'orientaziun spezialisada da la puraria definescha ils pensums dil pur. Tut tenor accent da lur manaschi cultiveschan ils purs oravant tut graun, verdura, puma ed ervas u tgiran vatgas, portgs, giaglinas, chauras u nursas. La plipart dals bains purils sa spezialisescha en ina direcziun: tratga d’animals, cultivaziun dad ers u cultivaziun da legums. I dat dentant era manaschis che lavuran sin tut ils champs.

En la cultivaziun dad ers e da legums èn purs responsabels per la cultivaziun dal terren. Els decidan tge plantas e tge grauns che vegnan emplantads. Suenter semnar e plantar controlleschan els che las culturas sa sviluppan bain. Els ladan lur funs e dovran products fitosanitars ch’èn pauc nuschaivels per l’ambient. Purs biologics èn sa spezialisads da lavurar a moda ecologica e persistenta e da mantegnair sin il terren fritgaivel ina gronda varietad da spezias.

Ils animals vegnan tegnids adequat a la spezia. Purs als pavlan, els fan or d’uigl, els han quità da las griflas e dal pail e guardan ch’ils animals survegnian las vaccinaziuns necessarias. Las vatgas vegnan mulschidas cun maschinas da mulscher modernas. Purs alleveschan animals giuvens ed als tgiran. Regularmain vegnan stallas e prads controllads. Reparaturas pitschnas sco era autras lavurs manualas fan els sezs.

Victualias sco latg, charn, ovs, puma e legums vegnan elavurads e conservads a moda cumpetenta. Els preparan lur products per la vendita, als distribueschan u als vendan direct en l’atgna butia dal bain puril.

Per la plipart da las lavurs dovran ils purs maschinas sco tractors, chargiafains, maschinas da segar e racoltar. Cun agid da programs da computer nodan els per exempel la bilantscha da substanzas nutritivas en il terren u la qualitad dal product e calculeschan e documenteschan  la quantitad dal pavel. En il mintgadi da lavur resguardan purs las prescripziuns da protecziun da l’ambient, da la sanadad e da la segirtad.

Per pudair exister a lunga vista ston purs chapir lur champ da lavur e manar lur manaschi a moda effizienta ed orientà a la fiera. Els han la survista davart dumondas socialas, economicas, politicas ed ecologicas e dumondas davart il dretg, sco p.ex. da la protecziun da l’ambient u da la tecnologia da gens.

Scolaziun

Basa legala

Ordinaziun federala dals 8-5-2008

Durada

3 onns

Furmaziun en la pratica

En manaschis purils, ina midada dal manaschi d’emprendissadi è usitada e da cussegliar

Furmaziun en scola

  • 1. + 2. onn: circa 1 di per emna a la scola professiunala
  • 3. onn: curs da bloc tar ina scola d’agricultura

Roms professiunals

  • cultivaziun da plantas (cultivar terren; semnar e plantar)
  • cultivaziun d’animals (tegnair, tgirar e trair animals da niz)
  • mecanisaziun ed indrizs tecnics
  • ambient da lavur
  • roms d’elecziun
  • La furmaziun da basa po era vegnir absolvida cun l’accent principal sin l’agricultura biologica.

    Curs ordaifer il manaschi

    segirtad da lavur e protecziun da la sanadad, igiena e garanzia da la qualitad, depositar e reparar maschinas ed apparaturas, diever da vehichels cun indrizs d’auzar e diever d’utensils per proteger las plantas, transport d’animals

    Maturitad professiunala

    Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

    Diplom

    Attestat federal da qualificaziun "pur / pura AFQ"

Premissas

Furmaziun preliminara
  • scola populara terminada
  • cun in attest federal professiunal (AFP), cun in attest federal da qualificaziun (AFQ) en in auter mastergn  u cun il diplom da maturitad cuzza la scolaziun per daventar pur AFQ per regla 2 onns
  • cun in attest federal da qualificaziun (AFQ) en in auter mastergn agricul cuzza la scolaziun per daventar pur AFQ sa per regla 1 onn
Pretensiuns
  • interess vi da la natira e vi da plantas
  • plaschair da lavurar cun animals
  • enclegientscha per ils connexs en la natira
  • patratgar iniziativ
  • inschign pratic-manual
  • enclegientscha tecnica, bun dun d’ir enturn cun maschinas
  • prontadad d’exequir lavurs malnettas e da lavurar la fin d’emna
  • buna sanadad

Furmaziun supplementara

Curs

purschidas da centers agriculs da furmaziun e da cussegliaziun

Furmaziun da basa scursanida

Suenter avair terminà la furmaziun da basa po vegnir absolvì ina furmaziun da basa scursanida dad 1 onn en ina autra professiun agricula.

Examen professiunal (EP)

mainagestiun d’agricultura, da cultivaziun da legums, da pumicultura u da cultivaziun da giaglinom cun certificat professiunal federal u in auter examen professiunal sin il champ da l’agricultura spezialist / spezialista per l’agricultura biodinamica cun certificat professiunal federal

Examen professiunal superiur (EPS)

maister pur / maistra pura maister / maistra per manaschis da giaglinom maister ortulan / maistra ortulana da legums maister pumicultur / maistra pumicultura u in auter examen professiunal superiur dal champ professiunal agricultura

Scola spezialisada superiura (SSS)

agrotecnicher / agrotecnicra dipl.  SSS commerziant agricul / commerzianta agricula SSS

Scola auta spezialisada (SAS)

Bachelor of Science (SAS) en agronomia Bachelor of Science (SAS) en inschigneria da l’ambient Bachelor of Science (SAS) en tecnologia da victualias

Cundiziuns da lavur

Purs cultiveschan l’agen u prendan a fittanza in bain puril. Els pon era lavurar sco emploiads sin in grond bain puril u tar ina societad cooperativa purila.

Cussegliaziun agricula, elavuraziun ulteriura e commerzi èn autras lavurs dal pur. I dat avunda plazzas d’emprendissadi.

La chargia da lavur po esser tut tenor aura e stagiun fitg auta. Relativamain blers purs lavuran per motivs economics mo a temp parzial u stagiunalmain sin in bain puril e surprendan anc ina lavur accessorica. Per pudair exister sin la fiera ston purs esser plain ideas ed avair in patratgar iniziativ e sentiment per trends en l’agricultura. La globalisaziun ed il midament dal clima èn ulteriuras sfidas per la glieud da professiun.

Ulteriuras infurmaziuns

OdA AgriAliForm
c/o Schweiz. Bauernverband
Laurstr.10
5201 Brugg AG
Tel: 056 462 54 30
URL: www.agri-job.ch

Revistas professiunalas:
"BauernZeitung"
"Schweizer Bauer"




orientamento.ch