Lavurs
Per la segirezza ed il confort dals participants al traffic èn bunas cuvridas da la via fitg impurtantas. Ellas èn era indispensablas per il transport da rauba spert e segir. Practicists e practicistas da construcziun da vias gidan da garantir la qualitad da las vias. Els na construeschan e mantegnan betg mo vias, mabain era plazzas, vias da velos e passapes, inslas da traffic u rundellas.
Sin il plazzal endrizzan practicists da construcziun il magazin. Els stgargian il material ed ils utensils dal camiun: lain per tavlegiadas, lattas per barricadar, vaus, grass d’unscher e da gestiun per las maschinas da construcziun, palas, paluttas, plattas da scurlattar, instruments da mesirar etc. Pitschnas lavurs da service vi dals apparats u vi dals utensils san els exequir independentamain.
Ensemen cun lur superiurs sa participeschan practicists da construcziun da vias vi da tut las lavurs da la construcziun da via. Els preparan per exempel il fundament e repartan l’asfalt chaud cun la pala u cun la maschina. Cun agid da la zulla cumpriman els las stresas da la cuvrida da la via.
Practicists da construcziun da via san leger plans e san sa drizzar tenor els. Las lavurs exequidas scrivan els en in rapport. Els lavuran adina en in team ed èn sut tschiel avert da tutt’aura. Els enconuschan ils privels sin il plazzal, resguardan las prescripziuns da segirezza e portan l’equipament da protecziun persunal.
Practicists da construcziun da via sa tegnan vi da las directivas davart la protecziun da l’ambient. Els allontaneschan materials da construcziun duvrads ed autras restanzas tenor las prescripziuns dal manaschi.
Scolaziun
Basa legala
Ordinaziun federala 1-11-2013
Durada
2 onns
Furmaziun en la pratica
En in manaschi da la construcziun da vias
Furmaziun en scola
Curs en bloc a la scola professiunala per constructurs e constructuras da vias da traffic a Sursee: en tut 18 emnas, da quellas 2 emnas furmaziun spezialisada "construcziun da vias"
Roms professiunals
- organisaziun da las lavurs e garanzia da la segirezza da lavur
- protecziun da la sanadad e da l’ambient
- execuziun da lavurs generalas en la construcziun da vias da traffic
- execuziun da lavurs da la construcziun da vias
Curs ordaifer il manaschi
Emprender ed exercitar a moda pratica la basa professiunala
Diplom
Attest federal professiunal "practicist / practicista da construcziun da vias AFP"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- fidadadad e perseveranza
- abilitad da lavurar en in team
- resistenza a l’aura
- forza corporala
- sanadad robusta
Furmaziun supplementara
Curs
purschidas da scolas spezialisadas e scolas professiunalas, dal Campus Sursee (Bildungszentrum Bau), da l’associaziun svizra per maisters constructurs sco era da manaschis da la construcziun da via
Construider / Construidra da vias AFQ
Practicists da construcziun da vias pon frequentar ina furmaziun da basa scursanida sco construider da vias AFQ (entrada al 2. onn da la furmaziun da basa)
Suenter quella scolaziun han els las medemas pussaivladads da furmaziun supplementara sco construider da vias AFQ.
Cundiziuns da lavur
Practicists da construcziun da vias lavuran en pitschens u pli gronds manaschis da la construcziun da via. Igl è pussibel ch’els ston lavurar la saira, la notg u durant fin d’emnas.
Ulteriuras infurmaziuns
Berufsfachschule Verkehrswegbauer
Postfach
6210 Sursee
Tel: 041 922 26 26
URL: www.verkehrswegbauer.ch
URL: www.bauberufe.ch
Fachverband Infra
Weinbergstr. 49
Postfach
8042 Zürich
Tel: 044 258 84 90
URL: www.infra-schweiz.ch
Revista professiunala:
"B. Magazin - Das Magazin für Verkehrswegbauer"