Lavurs
Palantschieus da plattas èn facils da nettegiar, han ina lunga vita ed èn bels. Practicistas e practicists da tschentar plattas mettan quests palantschieus da plattas. Els lavuran en edifizis novs e fan renovaziuns da chasas, d'edifizis industrials e da mastergn sco er d'edifizis publics.
Tenor l'instrucziun dals superiurs tschentan ils practicists da tschentar plattas las plattas da cheramica. Uschia cuvran els paraids e palantschieus. Avant che tschentar las plattas sto il funs vegnir preparà. Malgulivezzas vegnan muladas e foras stuppadas.
Tagliar las plattas pretenda da lavurar a moda exacta. Practicists da tschentar plattas dovran latiers maschinas per tagliar plattas, fresas da maun u fresas bletschas. Era zangas spezialas e maschinas da mular chantuns èn guaffens impurtants per practicists da tschentar plattas.
Per fixar las plattas sin palantschieus e sin paraids dovri ina sort colla. Questa massa da tatgar vegn maschedada e purtada si dals practicists da tschentar plattas.
Cura che las plattas èn tschentadas empleneschan ils practicists da tschentar plattas las chavas. Latiers dovran els differents products e tecnicas d'enchastrar. Per ch'ils novs palantschieus na vegnan betg tschufragnads u donnegiads als cuvran els a l'entschatta.
Las lavurs exequidas noteschan ils practicists da tschentar plattas en in rapport dal di. Els nodan quant temp e material ch'els han duvrà per in'incumbensa.
La gronda part da lur lavur vegn fatga en schanuglias. Perquai portan practicists da tschentar plattas savens paraschanugls. Els enconuschan ils privels da lur mastergn e resguardan las prescripziuns davart la segirezza da la lavur e la protecziun da la sanadad e da l'ambient.
Scolaziun
Basa legala
Ordinaziun federala 28-9-2010
Durada
2 onns
Furmaziun en la pratica
En in manaschi da tschentaplattas
Furmaziun en scola
1 di l'emna a la scola professiunala
Roms professiunals
- lavurs cun plattas
- administraziun
- segirezza da la lavur, protecziun da la sanadad e da l'ambient
Curs ordaifer il manaschi
Davart differents temas
Diplom
Attest federal professiunal "practicist / practicista da tschentar plattas AFP"
Premissas
Furmaziun preliminara
- scola populara terminada
Pretensiuns
- inschign manual
- buna sanadad
- forza corporala
- movibladad corporala
- moda da lavurar precisa ed exacta
Furmaziun supplementara
Curs
purschidas da scolas spezialisadas e professiunalas sco era da l'Associaziun svizra da tschentaplattas SPV
Tschentaplattas AFQ
Practicists da tschentar plattas AFP pon far ina furmaziun da basa scursanida sco tschentaplattas AFQ (access al segund onn da la furmaziun da basa).
Suenter han els las medemas pussaivladads da furmaziun supplementara sco tschentaplattas AFQ.
Cundiziuns da lavur
Practicists da tschentar plattas lavuran en manaschis da tschentaplattas. I sa tracta per il solit da manaschis pitschens e mesauns cun 2 fin 6 collavuraturs.
Practicists da tschentar plattas midan mintga pèr dis il plazzal. Els lavuran per regla en in team e tenor las instrucziuns d'in superiur.
Ulteriuras infurmaziuns
Associaziun svizra da tschentaplattas SPV
Keramikweg 3
6252 Dagmersellen
Tel: 062 748 42 52
URL: www.plattenverband.ch