![[object Object],[object Object]](https://media.sdbb.ch/transform/330e3cea-5ba6-46f0-80ae-88ee623c8e19/Bootbauer_TG_0206-jpg?io=transform:fill,width:740,height:490)
1. onn d’emprendissadi: CHF 650.–
2. onn d’emprendissadi: CHF 850.–
3. onn d’emprendissadi: CHF 1100.–
4. onn d’emprendissadi: CHF 1500.–
Sco construidra u construider da bartgas construeschas, reparas, renoveschas e mantegnas ti differentas bartgas da lain, da material sintetic u da metal, p.ex. bartgas a motor, bartgas a vela u bartgas da remblar. Ti studegias plans, tschernas il material e preparas quel. Ultra da quai monteschas ti l'equipament da navigaziun, endrizzas las cabinas e fas l'elavuraziun finala.
Incumbensas
- studegiar plans e dissegns
- tscherner il material per las singulas parts da bartgas
- duvrar furmas avant maun per far bists da lain
- producir novas furmas per bists da lain u da rascha artifiziala
- producir bists da bartgas: resgiar e splanar lain, storscher e rebatter metal u furmar e glimar materia sintetica
- rinforzar ils bists, per ch'els sajan stabils ed impermeabels
- glimar, pulir e vernischar surfatschas per embellir la bartga e per la far resistenta a l'aura
- procurar u producir sez installaziuns per las cabinas, p.ex. sezs, letgs u elements da cuschina
- montar ed encablar apparats electrics
- montar bischens, conducts, pumpas e tancs per ils indrizs sanitars
- montar il motor, la tracziun e la regulaziun
- montar indrizs radiofonics, sistems da navigaziun ed auters accessoris sco velas, masts u ancras
- controllar e mantegnair tut las parts da la bartga, p.ex. la structura, la punt, ils masts, las sugas, ils nufs ed ils equipaments tecnics
- svidar e nettegiar las bartgas
- reparar ils donns da las bartgas
- prender mesiras per ils tocs da reserva e sche necessari far ina skizza per producir e per montar tocs da reserva
- adattar las bartgas a novas normas da navigaziun vertentas, p.ex. auzar la cua u midar l'illuminaziun
- sgrattar giu e glimar giu stresas da colur veglias e stritgar da nov las surfatschas
- auzar las bartgas cun agid da cranas, turns e sugas ord l'aua e las transportar en il deposit
- spustar tut tenor la plazza da staziunament las bartgas per la proprietaria u il proprietari
- garantir en hallas cuvridas u sin surfatschas betg cuvridas, che las bartgas vegnian survegliadas
Ambient da lavur
Sco construidra u construider da bartgas lavuras ti en pitschens teams en lavuratoris serrads u mez averts. La gronda part da las lavurs fas ti dentant al liber. Qua ès ti savens en pe e stos esser ferma u ferm. Durant la stagiun da bartgas crescha la chargia da lavur, perquai ch'il manaschi porscha in servetsch da pannas durant las fins d'emna ed ils firads.
Ti lavuras sin plazzals navals en Svizra ed a l'exteriur. Suenter in'experientscha professiunala d'intgins onns pos ti daventar scheffa u schef da lavuratori u fundar tia atgna interpresa. Ti has er la pussaivladad da lavurar en la cussegliaziun da la clientella, en la vendita da bartgas e d'accessoris u controllar bartgas sco experta u expert.
Pretensiuns e interess
- Inschign manual
- Imaginaziun tridimensiunala
- Talent da dissegnar
- Moda da lavurar conscienziusa ed exacta
- Chapientscha tecnica
- Resistenza corporala
- Resistenza a la temperatura u a l'aura
- Abilitad da lavurar en in team
- Lavurar cun ils mauns
- Elavurar lain
- Schliar incumbensas tecnicas
- Planisar, construir, far dissegn tecnic
- Esser corporalmain activ
Scolaziun
La scolaziun vegn fatga sco emprendissadi en in manaschi.
Furmaziun pratica en in chantier: 4 dis per emna
1 di per emna en la scola professiunala spezialisada a Zofingen (AG)
Dagmersellen (LU): 20 dis durant 4 onns
4 onns
- Terminà la scola obligatorica
- Intgins manaschis pretendan in test da qualificaziun
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Construider / Construidra da bartgas AFQ
Furmaziun cuntinuanta
Curs
Purschidas da l'Associaziun svizra dals construiders da bartgas
Emprendissadi supplementar
Sco construidra u construider da bartgas pos ti per regla far in emprendissadi scursanì da Survegliader / Survegliadra da bartgas AFQ.
Examen professiunal (EP)
- Commerziant tecnic / Commerzianta tecnica EP
- Spezialist / Spezialista da servetsch tecnic EP
Scola spezialisada superiura (SSS)
- Tecnicist / Tecnicista da lain SSS scrinaria / construcziuns d'interiurs
- Tecnicist / Tecnicista da construcziun da maschinas SSS
Furmaziuns supplementaras a l'exteriur
- Bachelor of engineering en construcziun da navs e tecnica da la mar, Bremen e Kiel (Germania)
- Bachelor of science en navigation and maritime science, Plymouth (Engalterra)
- Bachelor of engineering en yacht and powercraft design u en maritime engineering, Southampton (Engalterra)
Tut tenor la scola auta spezialisada valan differentas cundiziuns d'admissiun.
Professiuns sumegliantas
