Vai al titolo

Planisader / Planisadra da tecnica d’edifizis sanitars AFQ

Planisadras e planisaders da tecnica d’edifizis sanitars planiseschan indrizs d’aua, d’aua persa e da gas. Els dissegnan ils plans, calculeschan ils detagls d’execuziun e surveglian la montascha.

Lavurs

Els exequeschan suandantas lavurs:

Planisar indrizs dad aua, aua persa ed indrizs da gas
  • sclerir cun ils architects, ils inschigners ed ils patruns da construcziun tge pretensiuns che las installaziuns sanitaras ston ademplir
  • resguardar ils giavischs da la clientella, las cundiziuns architectonicas e las prescripziuns legalas, p. ex. normas en connex cun l’igiena d’aua
  • infurmar ils spezialists davart differents materials, sistems e products
  • planisar ils indrizs sanitars a moda favuraivla a l’ambient, p.ex. cun nizzegiar aua da plievgia u energias regenerablas sco current solar u energia geotermica
  • calcular la grondezza ed ils custs dals indrizs ed elavurar offertas.
Calcular grondezza e custs e far offertas
  • far la calculaziun detagliada per la fabricaziun e montascha
  • designar plans detagliads dals indrizs sanitars per il persunal dal magazin e da montascha ed nudar ils indris en ils plans
  • lavurar sin ils plazzals ensemen cun il persunal da montascha, ils architects u ils patruns da construcziun
  • far glistas da material, empustar il material tar ils furniturs, survegliar ils termins
  • metter en funcziun ils indrizs installads e controllar, sch’els funcziunan
  • scriver instrucziuns per l’utilisaziun e dar instrucziuns per in diever segir
  • observar las prescripziuns per la protecziun cunter incendis sco er garantir la protecziun da l'atgna sanadad e segirezza

Scolaziun

Basa legala

Ordinaziun federala 6-10-2009 (versiun dals 1-1-2018)

Durada

4 onns

Furmaziun en la pratica

En in manaschi per indrizs sanitars u en in biro d’inschigneria per tecnica da construcziun; pratica en il magasin, en il lavuratori e sin il plazzal (almain 3 mais)

Furmaziun en scola

1 di per emna a la scola professiunala (cumplettà cun curs da bloc)

Roms professiunals

  • organisaziun dal manaschi
  • persistenza
  • segirezza da la lavur e protecziun cunter incendis
  • matematica
  • material da fabricaziun
  • basa da la chemia e da la fisica
  • terminologia e dinamica dals fluids
  • electrotecnica
  • mesirar – controllar – reglar, tecnica da construcziun e d’edifizis
  • process da planisaziun
  • indrizs sanitars

Curs ordaifer il manaschi

Emprender ed exercitar a moda pratica la basa professiunala

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "planisader / planisadra da tecnica d’edifizis sanitars AFQ"

Premissas

Furmaziun preliminara
  • temp da scola obligatoric terminà
  • bunas prestaziuns en geometria, matematica, fisica
Pretensiuns
  • plaschair da dissegnar tecnicamain, a maun u al computer
  • abilitad da s’imaginar chaussas en il spazi
  • moda da lavurar exacta e conscienziusa
  • talent d’organisar
  • plaschair da contact ed abilitad da communitgar, p.ex. lavur en il team e talent da contractar

Furmaziun supplementara

Curs

purschidas da centers da furmaziun da suissetec e da scolas professiunalas

Furmaziun da basa scursanida

en il champ professiunal "planisaziun da tecnica d’edifizis": planisader / planisadra da tecnica d’edifizis ventilaziun AFQ u planisader / planisadra da tecnica d’edifizis stgaudament AFQ

Examen professiunal (EP)

manader / manadra da project en tecnica d’edifizis cun certificat professiunal federal, cussegliader energetic / cussegliadra energetica edifizis cun certificat professiunal federal

Examen professiunal superiur (EPS)

planisader sanitar / planisadra sanitara cun diplom federal

Scola spezialisada superiura (SSS)

tecnicist / tecnicista dipl. tecnica d’edifizis

Scola auta spezialisada (SAS)

Bachelor of Science (SAS) en tecnica d’edifizis

Cundiziuns da lavur

Planisaders e planisadras da tecnica d’edifizis sanitars lavuran en biros da planisaziun e d’inschigneria sco er en manaschis per installaziuns sanitaras.

La purschida da plazzas d’emprendissadi è buna e persunas qualifitgadas  èn tschertgads sin il martgà da lavur. En la tecnica d’edifizis vegnan adina puspè introducids novs materials, novs sistems e novas prescripziuns, p.ex. en connex cun la minergia. Quai pretenda ina furmaziun supplementara regulara.

Ulteriuras infurmaziuns

Uniun da la tecnica d’edifizis da la Svizra e dal Principadi da Liechtenstein (suissetec)
Auf der Mauer 11
Chascha postala 1768
8021 Turitg
Tel: +41 43 244 73 00
URL: www.suissetec.ch





orientamento.ch