Lavurs
Els exequeschan suandantas lavurs
Sin il plazzal
- prender mesiras al plazzal a moda exacta cun agid da guaffens da mesirar moderns per avair las indicaziuns necessarias per ils plans
- resguardar ils giavischs il patrun, dals architects u las inschigneras durant dissegnar ils plans
- esser il persuna da contact en il project per ils posts interns, per la producziun e per la montascha
- controllar las lavurs fatgas en il lavuratori e sin il plazzal per savair garantir la qualitad
Far plans
- construir plans per verandas d’enviern, fanestras, ischs, portas, stgalas, tschabargals e construcziuns purtantas per edifizis sco fabricas, stadis da ballape, turs d’ascensurs sco era per fatschadas da metal e da vaider e fatschadas spezialas
- planisar la montascha e la demontascha sche edifizis existents ston vegnir renovads
- elavurar documents per tut las fasas d’in project, da la preparaziun a la producziun fin a la montascha
- far plans detagliads cun indicaziuns davart las lunghezzas exactas, il dumber e davart la metoda d’elavuraziun
- resguardar tar lur construcziuns aspects economics, statics ed ils aspects pertutgant la fisica da construcziun sco per exempel l’isolaziun cunter la chalur e l’insonorisaziun
- dissegnar ils plans al computer cun programs CAD en 2-D u 3-D
- resguardar normas e directivas actualas
Procurar per material
- elavurar sin basa da las lavurs preparativas las glistas da material e las glistas da la tocca ed ils documents d’empustaziun
- esser responsabels per la cumpra economica da las materialias
- empustar il material necessari, contractar cun ils furniturs ed administrar il deposit da material
Scolaziun
Basa legala
Ordinaziun federala 20-12-2006 (versiun dal 1-1-2018)
Durada
4 onns
Furmaziun en la pratica
En in biro tecnic d’in manaschi da metal, d’atschal, da fanestras u da fatschadas, cumplettà entras in praticum en in lavuratori ed in praticum da montascha (mintgamai min. 2 mais)
Furmaziun en scola
En l’emprim onn 1 ½ dis, a partir dal 2. onn 1 di per emna a la scola professiunala
Roms professiunals
- economia da manaschi ed organisaziun dal manaschi
- logistica ed economia da material
- ambient e segirezza
- construcziun
- fabricaziun
- montascha
- mantegniment
- tecnica da dissegn
- elavuraziun da plans e projects (tecnica da skizzar e d’illustraziun, organisaziun ed elavuraziun da plans, leger dissegns, illustraziun tenor directivas da dissegn, documents da project)
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "dissegnader-constructur / dissegnadra constructura en metal AFQ"
Premissas
Furmaziun preliminara
- temp da scola obligatoric terminà
- bunas prestaziuns en geometria, algebra, quint e dissegn tecnic
Pretensiuns
- imaginaziun spaziala
- enclegientscha tecnica
- plaschair vi dal quintar e vi dal planisar
- pazienza e perseveranza
- patratgar logic, senn per relaziuns abstractas
- talent d’organisaziun
- abilitad da communitgar
Furmaziun supplementara
Curs
purschidas da scolas professiunalas, scolas spezialisadas superiuras sco era d’associaziuns professiunalas, p.ex. la Schweiz. Metall-Union SMU
Furmaziun da basa scursanida
emprendissadi supplementar sco
constructura da metal AFQ (entrada en il 3. onn d’emprendissadi)
Examen professiunal (EP)
constructur da metal cun certificat federal
Examen professiunal superiur (EPS)
cun diplom federal: manader / manadra da project da construcziun en metal, maister / maistra da construcziun en metal
Scola spezialisada superiura (SSS)
p.ex. tecnicist diplomà / tecnicista diplomada construcziun da metal
Scola auta spezialisada (SAS)
Tar scolaziun preliminara correspundenta, p.ex. Bachelor of Science (SAS) en tecnica da construcziun, direcziun da profundaziun en paraids e mirs exteriurs (a la scola auta a Lucerna – tecnica ed architectura, Horw) u Bachelor of Arts (SAS) en architectura. Tut tenor scola auta spezialisada valan differentas cundiziuns d'admissiun.
Cundiziuns da lavur
Dissegnadra-constructuras e dissegnaders-constructurs en metal lavuran en biros tecnics da manaschis da la construcziun da metal, d’atschal, da fatschadas e da fanestras. Il pli savens sa tracti da manaschis pitschens u mesauns. Per part porschan era biros d’inschigners u biros da planisaziun plazzas d’emprendissadi. Pervi da las lavurs variantas èn constructurs en metal adina puspè confruntads cun novs pensums. Sco liom tranter posts interns ed externs stattan els plinavant en stretg contact cun differents partenaris. Dissegnaders-constructurs e dissegnadras-constructuras en metal han bunas schanzas sin il martgà da lavur. La branscha è dentant dependenta da la situaziun economica da l’industria da construcziun.
Ulteriuras infurmaziuns
AM Suisse
Seestr. 105
Postfach
8027 Zürich
Tel: +41 44 285 77 77
URL: www.metall-und-du.ch