Lavurs
Tecnologs e tecnologas da chemia e farmaceutica lavuran en manaschis che produceschan, experimenteschan e sviluppescha products per l’industria da chemia, da farma, da biotecnologia, da victualias e da material sintetic. Els dirigian e surveglian ils indrizs da fabricaziun automatisads, cun ils quals vegnan producids ed optimads medicaments, products fitosanitars e colurants sco era cosmetica. Tut tenor spezialisaziun dal manaschi lavuran tecnologs da chemia e farmaceutica en almain ina direcziun da la biotecnologia, tecnologia da chemia e farma.
Tecnologs da chemia e farmaceutica preparan l’andament da la producziun. Per obtegnair il product giavischà ston els unir las materias processualas il dretg temp e guardar ch’ils parameters sco per exempel temperatura e squitsch correspundian a las valurs fixadas en las prescripziuns. En cas da disturbis en l’andament da la producziun elimineschan els il problem a moda autonoma e cun las mesiras necessarias.
Per singuls pass processuals sco per exempel reacziun chemica, fermentaziun, furmar tablettas, destillaziun, extracziun e filtraziun han tecnologs da chemia e farmaceutica a disposiziun maschinas basadas sin computer e vias da producziun. Els surveglian, observan e protocolleschan tut ils pass da lavur. Sch’i fa da basegn, prendan els provas e las examineschan cun ils indrizs d’analisa.
Tecnologs da chemia e farmaceutica ston resguardar las prescripziuns davart la protecziun da la sanadad e da l’ambient sco er davart la segirezza da lavur. Cun lur savida dals process exequids dattan els impuls per optimar e per analisar il risico dal process.
Scolaziun
Basa legala
Ordinaziun federala 19-8-2014
Durada
3 onns
Furmaziun en la pratica
En in manaschi d’industria che producescha e sviluppescha products chemics, agrochemics, biotecnologics, farmaceutics u cosmetics
Furmaziun en scola
1 ½ dis per emna a la scola professiunala
Roms professiunals
- cultivar materia processuala
- tractar funtaunas d’energia e materia processuala
- configurar e reparar indrizs ed apparaturas
- elavurar materia processuala a moda chemic-tecnica / biotecnica / farmaceutic-tecnologica
- exequir process da nettegiar
Curs ordaifer il manaschi
Tar divers temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "tecnolog / tecnologa da chemia e farmaceutica AFQ"
Premissas
Furmaziun preliminara
- scola populara terminada
Pretensiuns
- interess vi da matematica, chemia e fisica
- enclegientscha tecnica
- inschign manual
- bun dun d‘observaziun
- fidadadad
- perseveranza
- moda da lavurar exacta
- flexibilitad
- abilitad da lavurar en in team
- abilitad da lavurar sut squitsch
- buna sanadad
Furmaziun supplementara
Curs
purschidas d’interpresas, dad «aprentas» sco er da scolas professiunalas e d’associaziuns professiunalas
Examen professiunal (EP)
p. ex. tecnolog / tecnologa da chemia
Scola spezialisada superiura (SSS)
tecnicist diplomà / tecnicista diplomada en la tecnica da sistems cun approfundaziun en tecnica farmaceutica e chemica
Scola auta spezialisada (SAS)
Bachelor of Science (SAS) en chemia, resp. Bachelor of Science (FHNW) en Molecular Life Sciences u Life Science Technologies cun approfundaziun en tecnica farmaceutica u medicinala, Bachelor of Science (HES-SO) en Life Technologies, Bachelor of Science (ZFH) en biotecnologia, Bachelor of Science (ZFH) en inschigneria da l‘ambient
Cundiziuns da lavur
Tecnologs da chemia e farmaceutica lavuran en differents manaschis d’industria, p. ex. da l’industria da chemia, agrochemia, biotecnologia u cosmetica.
Ils implants èn per ordinari en funcziun da tuttas uras e pretendan perquai lavur en squadras. La purschida da plazzas d’emprendissadi correspunda circa a la dumonda. Spezialmain en las regiuns da Basilea e dal Vallais datti bleras pussaivladads da lavurar en manaschis gronds. En autras regiuns datti cunzunt interpresas pitschnas e mesaunas.
Ulteriuras infurmaziuns
aprentas
Mauerstr.
4002 Basel
Tel: 061 696 18 30
URL: www.aprentas.ch
scienceindustries
Nordstr. 15
Postfach
8021 Zürich
Tel: 044 368 17 11
URL: www.scienceindustries.ch
SCV - Schweizerischer Chemie- und Pharmaberufe Verband
Postfach 509
4005 Basel
Tel: 079 688 08 91
URL: www.cp-technologe.ch
Revista professiunala:
"ChemieXtra"