Lavurs
Galvanostegistas tgiran surfatschas da tocs en elavuraziun. Per questa lavur preparan ellas a l'entschatta ina soluziun da sal metallic, l'uschenumnà electrolit. Latiers ston els resguardar la dretga cumposiziun da las chemicalias. Suenter bognan ellas ils objects en il liquid. Tras l'effect da current cuntinuà electric vegnan las surfatschas surtratgas p.ex. cun crom, arom u aur. Questas surtratgas protegian da corrusiun, augmentan la resistenza cunter isada ed il grad da direzza. Ellas megliereschan er la conductivitad e las qualitads da lutegiar u servan ad embellir objects.
Galvanostegists zincheschan struvas respectivamain vairas. Els surcromeschan alvers da manvella sco era ventils da motors. Ultra da quai argienteschan els elements da la tecnica d'auta tensiun e doreschan bischutaria, uras ed egliers. Plinavant rendan els conductivs elements da plastic cun dar si vernisch da conducziun e tgiran aluminium electrochemic. Cun anodisar vegn la surfatscha d'oxid protegida durablamain e sa lascha nettegiar meglier.
Per cuntanscher resultats da buna qualitad nettegian galvanostegistas ils elements crivs avant la surtratga e la tgiran a moda chemica e mecanica. Suenter lavan ellas ils elements. Per garantir e controllar la qualitad dovran ellas differents apparats da mesirar ed analisar. Latiers tutgan per exempel micrometers, microscops ed indrizs da controlla da la microstabilitad. En cas ch'i dat irregularitads prendan ellas las mesiras necessarias.
Galvanostegists ston resguardar las prescripziuns da segirezza resp. las prescripziuns da la protecziun da l'ambient e survegliar e mantegnair indrizs, maschinas e material.
Scolaziun
Basa legala
Ordinaziun federala 16-10-2009
Durada
3 onns
Furmaziun en la pratica
En in manaschi spezialisà en la galvanica
Furmaziun en scola
1 di l'emna a la scola professiunala
Roms professiunals
- tecnologia
- basa da la fisica e da la chemia
- quints dal rom
- enconuschientscha da materials
- garanzia e controlla da la qualitad
Curs ordaifer il manaschi
Tar differents temas
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "galvanostegist / galvanostegista AFQ"
Premissas
Furmaziun preliminara
- scola populara terminada cun bunas prestaziuns
- bunas prestaziuns en fisica e chemia
Pretensiuns
- interess da connexs chemics e fisicals
- inschign manual
- sanadad robusta
- naginas allergias
- movibladad corporala
- moda da lavurar autonoma
- fidadadad
Furmaziun supplementara
Curs
purschidas da scolas professiunalas e spezialisadas
Examen professiunal (EP)
cun certificat federal: spezialist / spezialista galvanotecnica
Scola spezialisada superiura (SSS)
p.ex. tecnicist / tecnicista dipl. SSS, direcziuns spezialas electrotecnica e construcziun en metal
Scola auta spezialisada (SAS)
Bachelor of Science (SAS) en chemia resp. Life Science, Bachelor of Science (SAS) en electrotecnica, e.u.v.
En Germania
tecnicist / tecnicista da la direcziun speziala galvanotecnica, p.ex. a Schwäbisch Gmünd, Solingen, Ilmenau u a Nürnberg
Cundiziuns da lavur
Galvanostegistas e galvanostegists lavuran en manaschis da galvanica u en partiziuns da galvanica d'interpresas da la branscha da metal prezius, d'uras, da bischutaria, da plattinas electronicas e da l'electrobranscha. Ulteriuras pussaivladads d'engaschament chattan els en il sectur da l'industria da l'aviatica e l'astronautica, en la construcziun da maschinas, navs e vehichels, en la tecnica da precisiun, en l'industria da maschinas per la chasada, da pusada, da rauba d'argient u da stampa. Els pon er lavurar en labors da controlla e perscrutaziun.
Ulteriuras infurmaziuns
SSO Schweizer Stiftung für Oberflächentechnik
Seilerstr. 22
Chascha postala 5853
3001 Berna
Tel: +41 31 310 20 12
URL: www.sso-fsts.ch
Uniun SWISSGALVANIC manaschis svizzers da galvanotecnica
8956 Killwangen
URL: www.galvano.ch
Vereinigung Schweizerischer Verzinkereien VSV
6005 Lucerna
URL: www.verzinkereien.ch
VSA-ASA Verein Schweizerischer Anodisierbetriebe
8027 Turitg
URL: www.vsa-asa.ch