Lavurs
Urers ed ureras da producziun èn spezialists cun abilitads multifaras. Els lavuran en l’industria d’uras, en fatschentas spezialisadas d’uras sco er en manaschis da la microtecnica.
La lavur vi da fitg pitschnas parts d’uras ed utensils pretenda precisiun maximala. Or d’atschal, mesch ed auter material fan urers da producziun parts d’uras ed utensils pitschens ch’els dovran per lur lavur. Latiers utiliseschan els ils proceders d’elavuraziun necessaris: Els gliman, foran, fresan e storschan parts fitg pitschnas, taglian crennadiras e puleschan surfatschas.
Urers da producziun mettan ensemen uras mecanicas, automaticas e simplas uras electronicas. Els mettan mecanissems da l’ura en chaschas da l’ura, tschentan plats da l’ura u indicaziuns digitalas e monteschan bratschlets da l’ura. Suenter la finiziun da las lavurs da montascha regleschan els l’ura per ch’ella giria exactamain.
Il funcziunament da l’ura e las pretensiuns esteticas controlleschan urers da producziun cun differents instruments ed apparats da mesiraziun. Els vesan e recupereschan disturbis mecanics u electronics. Parts defectas sco per exempel vaiders da l’ura, plats da l’ura u lantschettas remplazzan els. Suenter il remplazzar in toc controlleschan els, schebain l’ura è impermeabla.
Durant las differentas etappas da la producziun dovran urers da producziun las maschinas tenor las prescripziuns dal manaschi u da la branscha. Els resguardan las directivas da la segirezza da la lavur sco er da la protecziun da la sanadad e da l’ambient.
Scolaziun
Basa legala
Ordinaziun federala 19-12-2014
Durada
3 onns
Furmaziun en la pratica
En in manaschi da l’industria d’uras
Furmaziun en scola
1½ di per emna a la scola professiunala ZeitZentrum a Grenchen
Roms professiunals
- fabritgar apparats specifics per la branscha, applitgar las directivas areguard segirezza da la lavur, protecziun da la sanadad e da l’ambient
- metter ensemen tocs singuls
- reglar e regulaziun da precisiun
- collavurar al process da producziun
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "urer / urera da producziun AFQ"
Premissas
Furmaziun preliminara
- scola populara terminada, stgalim da scola mez
- bunas prestaziuns en matematica e fisica
Pretensiuns
- abilitad da s’imaginar chaussas en il spazi
- inschign manual
- pensar logic
- bun dun da percepziun
- enclegientscha tecnica
- pazienza e perseveranza
- abilitad da sa concentrar
- senn per urden e nettezza
- vesida normala (era vesida curregida)
Furmaziun supplementara
Curs
purschidas da la federaziun da patruns da l’industria d’uras svizra e da scolas spezialisadas da la branscha d’uras
Urer / urera AFQ
urers / ureras da producziun pon frequentar ina furmaziun da basa scursanida sco urer / urera AFQ (access al 3. onn da furmaziun da basa).
Examen professiunal superiur (EPS)
maister urer / maistra urera: ctualmain na vegnan manads tras nagins examens.
Scola spezialisada superiura (SSS)
p.ex. tecnicist / tecnicista microtecnica dipl. SSS (cun differentas approfundaziuns), tecnicist / tecnicista dipl. SSS construcziun da maschinas, approfundaziun tecnica da producziun
Scola auta spezialisada (SAS)
p.ex. Bachelor of Science (SAS) en microtecnica, Bachelor of Arts (SAS) en design da product ed industria
Cundiziuns da lavur
Urers da producziun èn spezialists tschertgads. Els lavuran tant en l’industria d’uras sco er en fatschentas spezialisadas d’uras sco er en manaschis da la microtecnica, da la tecnica medicinala u en autras branschas da precisiun.
La purschida da plazzas d’emprendissadi per urers da producziun sa limitescha principalmain sin la regiun da l’industria d’uras en l’artg dal Giura tranter Genevra e Schaffusa.
Ulteriuras infurmaziuns
ZeitZentrum Uhrmacherschule Grenchen
2540 Grenchen
Tel: 032 654 27 00
URL: www.bbzsogr.so.ch
Arbeitgeberverband der schweiz. Uhrenindustrie
2301 La Chaux-de-Fonds
Tel: 032 910 03 83
URL: www.cpih.ch
Verband Schweizer Goldschmiede und Uhrenfachgeschäfte VSGU
3000 Bern 7
Tel: 031 329 20 72
URL: vsgu-ashb.ch