Lavurs
Electronistas ed electronists da multimedia lavuran en interpresas dals secturs da radio e televisiun, televisiun a cabel, electronica per events e tecnica da segirezza. Els installeschan, configureschan e mantegnan per exempel apparats da televisiun e da DVD, tablets, smartphones, indrizs da musica, da satellit, d'alarm e da surveglianza, computers cun apparats periferics sco stampaders u scanners. La midada tecnologica svelta da la branscha da multimedia influenzescha la lavur dal mintgadi dals spezialists. Els tegnan pass a la tecnica e s'occupan adina puspè cun novs products.
Electronists da multimedia cun accent vendita e service cusseglian la clientella a moda cumpetenta en tuttas dumondas da l'electronica da multimedia. Els controlleschan apparats, analiseschan sbagls e fan reparaturas. Tar il client u la clienta fan els lavurs da service u mantegniment, gidan per exempel d'installar cumponentas dal computer u da la rait e las configureschan. Sch'els na pon betg far las lavurs da service u las reparaturas al lieu, prendan els ils apparats cun els en il lavuratori. Ultra da quai planiseschan els en il lavuratori soluziuns multimedialas, las preparan e fan adattaziuns specificas per il client.
Electronists da multimedia cun accent indrizs da recepziun e da transport lavuran en interpresas da radio e televisiun sco er en firmas da rait da cabels e da telecommunicaziun. Els calculeschan, installeschan e mantegnan indrizs da cabels moderns e raits da transport en stabiliments novs u en chasas existentas. Tar las incumbensas dals spezialists tutgan er l'installar antennas, l'amplifitgar installaziuns existentas e la messa en funcziun da sistems da segirezza.
Dals secturs event, segirezza, telematica, installaziun electronica e tecnica da preschentaziun s'occupan electronists da multimedia cun accent tecnica d'audio e video e tecnica da segirezza. Els endrizzan per exempel conferenzas da video, installeschan indrizs da surveglianza u equipeschan occurrenzas grondas cun indrizs audiovisuals ed als surveglian.
Electronists da multimedia calculeschan ils custs per material e per la lavur e scrivan offertas. Cura ch'els han survegnì in'incumbensa, planiseschan els las lavurs ed empostan ils apparats ed il material. Lur servetschs fan els a moda ecologica e cun resguardar las resursas.
Scolaziun
Basa legala
Ordinaziun federala 1-11-2013
Durada
4 onns
Accents
- vendita e service
- indrizs da recepziun e da transport
- tecnica d'audio u video e tecnica da segirezza
Furmaziun en la pratica
En in manaschi d'emprendissadi
Furmaziun en scola
2 dis l'emna a la scola professiunala durant ils emprims dus onns d'emprendissadi, 1 di l'emna en il 3. ed il 4. onn d'emprendissadi.
Roms professiunals
- analisar e mesirar
- organisar la lavur
- cussegliar e vender
- mantegnair, reparar e midar
- installar e metter en funcziun
- sviluppar e realisar projects da la clientella
- communitgar en ina segunda lingua
Curs ordaifer il manaschi
Davart differents temas
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "electronist / electronista da multimedia AFQ"
Premissas
Furmaziun preliminara
- scola populara terminada, stgalim da scola mesaun fin aut
Pretensiuns
- enclegientscha tecnica
- bunas enconuschientschas da la matematica
- mauns inschignaivels per lavurar a moda precisa
- pazienza e perseveranza
- buna demananza
- nagin disturbi da la vesida da colurs
Furmaziun supplementara
Curs
purschidas da la federaziun VSRT, da scolas professiunalas e spezialisadas
Examen professiunal (EP)
p.ex. electronist / electronista multimedia cun certificat professiunal federal (en elavuraziun), tecnicist / tecnicista d'occurrenzas cun certificat professiunal federal, tecnicist / tecnicista dal tun cun certificat professiunal federa
Scola spezialisada superiura (SSS)
tecnicist / tecnicista dipl. SSS, p.ex. cun accent electrotecnica, telecommunicaziun, informatica u medias
Scola auta spezialisada (SAS)
cun furmaziun supplementara correspundenta, p.ex. Bachelor SAS en electrotecnica, Bachelor SAS en telecommunicaziun, Bachelor SAS en informatica, Bachelor SAS en tecnica da sistems u Bachelor SAS e mecantronica
Cundiziuns da lavur
Electronists da multimedia lavuran en tut ils secturs da la branscha da consumer-electronics sco er en ils secturs da la tecnica d'events, da segirezza e d'installaziun. Plazzas da lavur chattan els p.ex. en interpresas da radio e televisiun, interpresas per products da consumer-electronics, firmas da rait da cabels e da telecommunicaziun, firmas da la tecnica d'events e firmas da segirezza cun apparats electronics per la surveglianza. Pussaivel èsi era da lavurar independentamain u en secturs parentads sco la telematica u l'informatica.
La dumonda da plazzas d'emprendissadi è en intginas regiuns pli gronda che la purschida. Quai pretenda in engaschament correspundent a la tschertga d'ina plazza d'emprendissadi.
Electronists da multimedia han bunas schanzas sin il martgà da lavur.
Ulteriuras infurmaziuns
Federaziun svizra dal commerzi spezialisà da radio, televisiun e multimedia VSRT
Niklaus-Wengi-Str. 25
2540 Grenchen 1
Tel: 032 654 20 20
URL: www.vsrt.ch
Revista professiunala:
"Multimedia-Revue"