Lavurs
Electricists ed electricistas da montascha èn – ensemen cun ils electroinstallaturs – responsabels per installaziuns electricas. Els installeschan las colliaziuns per il current, il telefon, l’internet, la televisiun ed il radio en tegnairchasas privats sco era en il commerzi. Els endrizzan las colliaziuns en edifizis da l’attatg enfin las bischlas.
Avant ch’electricists/tas da montascha van sin il plazzal sa semtgan els en il magasin cun il material ed ils guaffens necessaris. Els dovran differents guaffens sco maschinas da furar e fresas, tirastruvas, zangas da tagliar, zangas d'isolar ed instruments da mesirar.
Tar las lavurs d’installaziun en construcziuns bruttas sa tegnan electricists ed electricistas da montascha conscienziusamain vi dals plans e mettan las lingias e monteschan stgaffas da segiranza. Pli tard, durant las construcziuns interiuras, tiran els fildaroms e cabels en ils bischens da protecziun tschentads ed installeschan bischlas. Cur che la construcziun nova è bunamain finida installeschan els lura ils instruments ed ils apparats e controlleschan tenor l’instrucziun d’electroinstallaturs, sche tut funcziuna.
Per proteger persunas e chaussas ston electricistas da montascha resguardar exactamain las prescripziuns da segirezza. Els enconuschan las directivas e protegian sasez e l’ambient, p.ex. cun purtar egliers da protecziun e protecziuns da l’udida tar lavurs pulvrusas e canerusas.
Electricists ed electricistas da montascha exequeschan las installaziuns per gronda part independentamain. Tar installaziuns pli cumplitgadas e per metter en funcziun implants han els mintgamai sustegn d’electroinstallaturs. La lavur en il team è impurtanta.
Il champ da lavur d’electricists ed electricistas da montascha è fitg variants. El cumpiglia lavurs pli groppas sco il metter bischens en mirs e palantschieus, la montascha da trassés ed il trair dals cabels sco era lavurs da precisiun sco la colliaziun da filfiers. Els lavuran savens sin puntanadas u stgalas ed els midan savens lur plaz da lavur.
Scolaziun
Basa legala
Ordinaziun federala 27-04-2015 (stadi dal 1-1-2018)
Durada
3 onns
Furmaziun en la pratica
En in manaschi d’installaziuns electricas
Furmaziun en scola
1 di per emna a la scola professiunala
Roms professiunals
- incumbensas e funcziuns intermanaschialas
- tecnica d’elavuraziun
- basa tecnologica
- documentaziun tecnica
- tecnica da sistems electrics
- tematicas da scolaziun includentas
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "electricist / electricista da montascha AFQ"
Premissas
Furmaziun preliminara
- scola populara terminada
- en regiuns singulas è in test da qualificaziun pretendì
Pretensiuns
- forza corporala (per auzar chargias grevas)
- inschign manual
- abilitad da lavurar en in team
- abilitad da distinguer colurs (per distinguer ils differents cabels)
- plaschair vi da la lavur en il liber resp. esser resistent a l’aura
Furmaziun supplementara
Curs
purschidas d’associaziuns professiunalas, scolas professiunalas ed instituts tecnics
Furmaziun da basa scursanida
Electricists da montascha pon far ina furmaziun da basa da 2 onns sco electroinstallatur, electroplanisader/dra ni telematicher/ra AFQ
Examen professiunal (EP)
cun il certificat federal da capacitad AFQ: manader/a da project d'installaziuns e da la segirtad, manader da projects da l'electroplanisaziun, manader da projecst d'automatisaziun dad edifizis e.u.v.
Examen professiunal superiur (EPS)
expert d'electroinstallaziuns e da la segirtad diplomà, expert da l'electroplanisaziun diplom
Scola spezialisada superiura (SSS)
Direcziuns da studis en il sectur tecnic, p.ex. tecnicist/tecnicista electrotecnica diplomà/ada tecnicist/tecnicista telecommunicaziun diplomà/ada
Scola auta spezialisada (SAS)
p.ex. Bachelor of Science (SAS) en electrotecnica, Bachelor of Science (SAS) en tecnica d'edifizis (direcziun da studi Gebäude-Elektroengineering)
Cundiziuns da lavur
Electricists da montascha èn occupads principalmain en manaschis d’installaziun electrica. Tut tenor il lieu da lavur ston els era lavurar la notg u la fin d’emna.
Installaziuns electronicas e tecnologicas èn ozendi indispensablas per il funcziunament da l’economia e da la societad. Spezialists da branscha han perquai bunas schanzas sin il martgà da lavur.
Ulteriuras infurmaziuns
EIT.swiss
Limmatstr. 63
8000 Zürich
Tel: +41 44 444 17 17
URL: www.elektriker.ch
Revistas professiunalas:
"Electro Revue"
"Elektrotechnik"