Vai al titolo

Electricist / Electricista da rait AFQ

Lavurs

Electricistas ed electricists da rait construeschan e tgiran stabiliments d'energia, da telecommunicaziun e da lingias electricas. Tut tenor l'accent gidan els a garantir in provediment fidà ed ecologic cun energia electrica e cun servetschs da telecommunicaziun per il traffic public e per la clientella da l'industria, dal mastergn e dal commerzi sco er per las chasadas privatas.

Lur lavurs èn las suandantas:

Cun accent energia
  • metter e mantegnair lingias da bassa e d'auta tensiun
  • montar e mantegnair lingias al liber, pia las lingias che vegnan manadas tras l'aria cun agid da pitgas
  • construir e tgirar cabinas da distribuziun sco er staziuns da cumond e da transfurmaziun
  • construir e tgirar illuminaziuns da vias
  • montar indrizs da protecziun electrics, colliaziuns cun la terra e lingias da restituziun d'electricitad
  • far mesiras da controlla e metter en funcziun ils stabiliments
Cun accent lingias electricas
  • garantir il provediment cun electricitad per trens, bus e trams
  • construir e tgirar lingias da cabel e da contact per ils meds da transport publics
  • montar e metter pitgas, sugas da francada (per francar las pitgas), francaziuns e fixaziuns per lingias electricas
  • far controllas e lavurs da mantegniment
  • montar indrizs da protecziun electrics, colliaziuns cun la terra e lingias da restituziun d'electricitad
  • far mesiras da controlla e metter en funcziun ils stabiliments
Cun accent telecommunicaziun
  • metter cabels d'arom u da fibras da vaider per raits da telecommunicaziun
  • entretschar lingias, quai vul dir, colliar lingias ina cun l'autra
  • far mesiraziuns e controllas da qualitad
  • far montaschas spezialas per vischnancas, per interpresas da telecommunicaziun e dal provediment d'energia
  • identifitgar ed eliminar disturbis

Scolaziun

Durada

3 onns

Accents

  • Energia
  • Lingias electricas
  • Telecommunicaziun

Furmaziun pratica professiunala

En interpresas d'electricitad u da telecommunicaziun, en interpresas da transport sco er en firmas per la construcziun da cabels, da lingias da contact e da lingias al liber

Furmaziun en scola

1 di per emna a la scola professiunala spezialisada

Cuntegns didactics

  • preparar lavurs d'infrastructura da rait
  • finalisar lavurs d'infrastructura da rait
  • construir infrastructura da rait
  • montar, colliar e demontar cumponentas da l'infrastructura da rait
  • mantegnair e tgirar infrastructuras da rait

Curs intermanaschials


Emprender la lavur pratica ed exercitar las basas professiunalas, 40 dis durant 3 onns

Maturitad professiunala

Sche las prestaziuns da scola èn fitg bunas, po ins frequentar la scola da maturitad professiunala durant la furmaziun fundamentala.

Diplom

Electricist / Electricista da rait AFQ

Premissas

Furmaziun preliminara
  • Terminà scola obligatorica
Pretensiuns
  • inschign manual
  • chapientscha tecnica
  • buna sanadad
  • esser senza sturnizi
  • nagin disturbi da vesair colurs
  • moda da lavurar fidada
  • abilitad da lavurar en in team

Furmaziun supplementara

Curs

Purschidas da federaziuns professiunalas, da scolas spezialisadas e da scolas professiunalas spezialisadas, d'interpresas da la branscha d'electricitad e
da telecommunicaziun sco er d'interpresas da transport

Examen professiunal (EP)

Spezialist/-a da rait cun certificat professiunal federal u spezialist/-a cun da mantegniment cun certificat professiunal federal

Examen professiunal superiur (EPS)

Maister d’electrica da rait diplomà / maistra d’electrica da rait diplomada, manader da mantegniment diplomà / manadra da mantegniment diplomada, cussegliader / cussegliadra d’energia ed effizienza cun diplom federal

Scola spezialisada superiura (SSS)

Electrotecnicist/-a dipl. SSS

Scola auta spezialisada (SAS)

Studis en secturs spezials parentads, p.ex. bachelor of science en electrotecnica u en tecnica d'edifizis. Tut tenor la scola auta spezialisada valan differentas cundiziuns d'admissiun.

Relaziuns da lavur

Electricists da rait lavuran en interpresas d’electricitad, da telecommunicaziun, da transport sco era en manaschis da la construcziun da cabels, lingias electricas e lingias al liber.

Electricistas ed electricists da rait lavuran en in team, per part en stabiliments da distribuziun e per part al liber, e quai da tutt'aura. Els lavuran cun iseglia e maschinas che als faciliteschan lur lavur. La segirezza è in tema impurtant per els. Perquai dovran els l'equipament da protecziun usità sco ina chapellina u in equipament da protecziun cunter crudadas, per far tschertas lavurs (p.ex. lavurs en grondas autezzas). Il temp da lavur è per regla regular, nun ch'in disturbi stoppia vegnir eliminà svelt. Las lavurs vi da las raits dal traffic public vegnan fatgas normalmain durant la notg, per che la clientella possia viagiar durant il di.

Electricistas ed electricists da rait lavuran en interpresas che produceschan e che distribueschan energia electrica, sco er en interpresas da transport, da telecommunicaziun u en ovras electricas sin plaun communal e chantunal. Pervia dal svilup tecnologic e pervia dals basegns che s'augmentan en il sectur da l'electricitad e da la telecommunicaziun èn las perspectivas sin il martgà da lavur bunas. Suenter intgins onns pratica professiunala pon els surpigliar posiziuns da responsabladad en l'interpresa, per exempel sco manadra da team u sco manader da project.

Ulteriuras infurmaziuns

Associaziun da las interpresas electricas svizras AES
URL: www.strom.ch

Associaziun d'interpresas da construcziun da lingias al liber e cabels AILC
URL: www.vffk.ch

Federaziun svizra d'infrastructura da rait SNiv
URL: www.sniv.ch

Uniun dals transports publics UTP
URL: www.voev.ch



orientamento.ch