Lavurs
La part da vaider en bajetgs è creschida cuntinuadamain ils davos decennis. Quai ha da far tranter auter cun las pussaivladads adina pli bunas e multifaras d'elavurar vaider. Uschia pon per exempel surtratgas fitg finas ed invisiblas augmentar las abilitads da l’isolaziun termica dal vaider. Era vaider che protegia cunter la glisch dal sulegl vegn utilisà savens.
En il lavuratori fan vaidreras e vaidrers or da vaider flottà, vaider culà e vaider spezial products d'auta qualitad per zonas a l’interiur ed a l’exteriur: fatschadas da vaider, tetgs da vaider, ischs da vaider, spundas da vaider, palantschieus da vaider, duschas da vaider, mobiglias da vaider, etc.
Cun indrizs dirigids dal computer taglian ils vaidrers cun gronda precisiun las tavlas da vaider che han ina dimensiun da fin a trais giadas sis meters e gizzan ils urs dal vaider cun maschinas sfradentadas cun aua. Els fan foppas en il vaider e foran rusnas per montar enferradira u scharniers. Per lavurs pli pitschnas utiliseschan els apparats electrics e pneumatics.
Vaidrers concepeschan lavurs da vaider. Per quai dissegnan els a maun u cun agid da programs CAD ils plans da construcziun ed elavuran ils documents per la producziun. Els resguardan la grossezza dal vaider staticamain correcta sco er ils basegns da segirezza specifics, cunzunt per stgalas e spundas da vaider.
Tar la clientella e sin il plazzal mettan vaidrers ensemen la tocca prefabritgada e la monteschan. Coordinar las lavur cun ils collegas dal fatg e cun auters mastergnants da construcziun è fitg impurtant.
Tut tenor l'interess e la preferenza pon vaidrers sa spezialisar sin lavurs da producziun u sin lavurs da montascha u era lavurar sco generalists; els lavuran damai en teams u era sulets.
Ils vaidrers resguardan las prescripziuns davart la protecziun da la sanadad, la segirezza da la lavur e la protecziun da l’ambient. Il vaider sco material ideal per reciclar motivescha els da tegnair en egl aspects ecologics.
Scolaziun
Basa legala
Ordinaziun federala 18-8-2011
Durada
4 onns
Furmaziun en la pratica
En in manaschi da vaider
Furmaziun en scola
1 di l'emna a la scola professiunala ad Olten
Roms professiunals
- Elavuraziun da vaider e d’objects da vaider
- concepziun d’objects da vaider e lur utilisaziun
- enconuschientschas dals materials
- quints dal rom
- enconuschientschas da basa en fisica e chemia
- dissegn e skizzar
Curs ordaifer il manaschi
Emprender ed exercitar en la pratica las basas professiunalas
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "vaidrer / vaidrera AFQ"
Premissas
Furmaziun preliminara
- scola populara terminada
- bunas prestaziuns en quints e geometria
Pretensiuns
- inschign manual
- enclegientscha pratica
- interess tecnic
- senn da visualisaziun spaziala
- buna cundiziun fisica
- abilitad da lavurar en ina gruppa
Furmaziun supplementara
Curs
purschidas da scolas spezialisadas e professiunalas sco era d’associaziuns professiunalas, particularmain da l'Associaziun svizra dal vaider plat SFV u da l'Institut svizzer dal vaider en la construcziun SIGAB
Examen professiunal (EP)
schef / scheffa dal lavuratori e da la montascha (vaider) cun certificat professiunal federal, manader / manadra da project (vaider) cun certificat professiunal federal
Examen professiunal superiur (EPS)
maister / maistra da vaidraria
Scola spezialisada superiura (SSS)
curs da furmaziun e secturs parentads, p.ex. tecnicist diplomà / tecnicista diplomada SSS construcziun da metal u tecnicist diplomà / tecnicista diplomada SSS planisaziun da construcziun
Scola auta spezialisada (SAS)
direcziun da studi en secturs parentads, p.ex. Bachelor of Science (SAS) en inschigneria da construcziun
Cundiziuns da lavur
Vaidrers lavuran en manaschis da vaider pli gronds u pli pitschens. Cun experientscha correspundenta daventan els experts tschertgads che pon surpigliar responsabladad da manaders.
Ulteriuras infurmaziuns
Associaziun svizra dal vaider plat SFV
Rütistr. 16
8952 Schlieren
Tel: 044 755 50 40
URL: www.sfv-asvp.ch