Isolaziuns e cuvertas gidan per l’ina a proteger ils indrizs e la tocca. Per l’autra gidan tolers cun lur lavur a spargnar resursas ed energia.

Toleras e tolers d’isolaziuns isoleschan e cuvran stgaudaments, boilers, installaziuns sanitaras, indrizs d’aria cundiziunada ed auters indrizs tecnics cun material d’isolar. Sper isolar la chalur adempleschan las isolaziuns anc auters intents: ellas eviteschan perdita da fraid e servan cunter canera, umiditad e contact corporal u sco protecziun cunter incendis.

Sin il plazzal prendan tolers d’isolaziuns la mesira da la tocca e calculeschan quanta isolaziun ch’i basegna. En il lavuratori preparan els l’isolaziun per mintga element da construcziun. Or da tola fina e differents materials sintetics produceschan els cuvridas per conducts da bischens, canals d’ariaziun ed apparats. Els taglian la tola, la storschan e faudan en la furma giavischada. La tocca singula vegn rebattida e fixada cun struvas. Durant ils divers pass da lavur dovran els guaffens da maun e maschinas modernas.

Ils elements da construcziun prefabritgads vegnan montads sin il plazzal. Tolers d’isolaziuns cuvran apparats, armaturas e chanalisaziuns cun il material d’isolaziun e fan il revestgiment. Cun pes da sustegn e tegnadistanzas stabiliseschan els l’isolaziun e la cuvrida.

Tolers d’isolaziuns enconuschan ils privels sin ils plazzals. Els protegian lur collavuraturs e sasezs cun resguardar las prescripziun da segirezza, las mesiras per la protecziun da l’ambient sco era cun prender mesiras per la protecziun cunter accidents e cun purtar l’equipament da protecziun. Els fan attenziun che las prescripziuns per la protecziun da l’ambient vegnan resguardadas. Material utilisà e material nuschaivel per l’ambient vegn dismess tenor las prescripziuns dal manaschi.