Pagina iniziale miOriento

Interessi e caratteristiche personali - Passo 1: Prendo conoscenza dei miei interessi e delle mie caratteristiche personali

Professioni e formazioni - Passo 2: Esploro le diverse professioni e formazioni

Caratteristiche personali e abilità - Passo 3: Confronto i miei interessi e le mie caratteristiche personali con le abilità richieste dalle professioni e formazioni

Stage d'orientamento - Passo 4: Svolgo degli stage d'orientamento per scoprire qual è la professione più adatta a me

Esaminare e prendere una decisione - Passo 5: Esamino i mestieri e le formazioni per elaborare il mio progetto formativo

Tirocinio in azienda o scuola a tempo pieno - Passo 6: Metto in pratica la mia decisione: cerco un posto di tirocinio o mi iscrivo ad una scuola

Prepararsi per la nuova formazione - Passo 7: Mi preparo alla nuova formazione o valuto se optare per una soluzione transitoria

Cartella di lavoro - I tuoi risultati

Per favore attendere...

miOriento sta caricando.

Disconnesso

La sua sessione di lavoro è finita. Verrà reindirizzato sulla pagina iniziale. Si connetta nuovamente per continuare la sessione.

Construider / Construidra d'instruments da musica AFQ

Construiders e construidras d'instruments da musica s'occupan dal mantegniment, da la reparatura, da la construcziun e da la vendita d'instruments. Els possedan inschign manual, sunan l'instrument e cusseglian lur clientella a moda cumpetenta.

Lavurs

Construiders e construidras d'instruments da musica lavuran en lavuratoris, ateliers ed affars spezialisads. Els mantegnan, reparan, construeschan e vendan instruments da musica. Els han in'udida scolada e san sunar l'instrument, uschia ch'els pon valitar la qualitad dal tun e da la tecnica da sunar da l'instrument. Entaifer la professiun datti tschintg direcziuns spezialas: construcziun d'instruments a flad, reparatura d'instruments a flad, construcziun da clavazins, construcziun d'orglas e construcziun da tschivlots da l'orgla. Las incumbensas dals spezialists èn tut tenor direcziun speziala differentas.

En la construcziun d'instruments a flad fan els or da sturs, bavriels, stangas e products mezfinids trumbettas, posaunas, corns, cornets, tubas ed auters instruments a flad cun buchins-parlet. Or d'elements da sturs tagliads furman els bavriels conics e cilindrics e lutegian ils urs. Per pudair storscher ils bavriels als emplainan els cun plum liquid.

En la reparatura d'instruments a flad mantegnan e reparan els instruments da lain ed instruments a flad da sturs. Latiers ston els prender dapart ils instruments u schizunt lutegiar dapart els. Els collan stgarps ed unschan parts da lain, remplazzan ventils, plimas e parts corrodadas, drizzan dettals e guliveschan bottas. Suenter ch'els han mess ensemen l'instrument, giusteschan els la mecanica cun gronda finezza.

Construiders d'instruments a flad da la direcziun speziala construcziun da clavazins s'occupan surtut cun mantegnair e reparar sco era cun accordar clavazins e clavazins a cua. Lavurs usitadas èn p.ex. remplazzar fieuters dal martè e chaus dal martè, tastaturas u cordas. Tar las lavurs da reparatura pli grondas tutgan reparar stgarps en il funs da resonanza e remplazzar giufs.

En la construcziun d'orglas fan construiders d'instruments da musica differents elements d'ina orgla ed als monteschan: claviaturas, tracturas, portavents, ventils da tun e da register, provediments da vent, tschivlots da lain e da metal sco era la chascha. Per quai elavuran els lain massiv e metals. Al lieu da lavur vegn l'orgla definitivamain montada, intunada ed accordada.

Construiders d'instruments da musica da la direcziun speziala construcziun da tschivlots da l'orgla sa spezialiseschan sin la construcziun da tschivlots. Els lavuran tenor plans dal construider d'orglas. Or da plattas ch'els han culà sezs or da differents liaments da zin e plum taglian els ora parts, las enrulleschan e las lutegian. Reparar e remplazzar tschivlots da l'orgla donnegiads tutga medemamain tar lur incumbensas.

Scolaziun

Basa legala

Ordinaziun federala 8-8-2007

Durada

4 onns

Direcziuns

  • construcziun d'instruments a flad
  • reparatura d'instruments a flad
  • construcziun da clavazins
  • construcziun d'orglas
  • construcziun da tschivlots da l'orgla

Furmaziun en la pratica

En in atelier u in affar spezialisà per la construcziun d'instruments

Furmaziun en scola

Curs da bloc al center da furmaziun Arenenberg a Salenstein (TG) (instrucziun bilingua: tudestg e franzos)

Roms professiunals

  • instrucziun d'utensils
  • instrucziun da materials
  • tecnica da proceder
  • tecnica d'elavurar
  • acustica
  • instrucziun da mensuraziun
  • dissegn spezialisà
  • mecanica
  • teoria da construcziun
  • electrica
  • pneumatica
  • instrucziun d'instruments
  • instrucziun da stils

Curs ordaifer il manaschi

Davart differents temas

Maturitad professiunala

Fitg bunas prestaziuns da scola permettan da frequentar la scola da maturitad professiunala durant la furmaziun da basa.

Diplom

Attestat federal da qualificaziun "construider / construidra d'instruments da musica AFQ"

Premissas

Furmaziun preliminara
  • scola populara terminada
  • instrucziun instrumentala d'in instrument, en il meglier cas da la direcziun speziala elegida
Pretensiuns
  • inschign manual
  • imaginaziun dal spazi
  • bun egl
  • talent da dissegnar
  • sentiment estetic
  • mauns ruassaivels, buna motorica fina
  • moda da lavurar conscienziusa
  • musicalitad, udida musicala
  • buna demananza
  • pazienza e perseveranza

Furmaziun supplementara

Curs

purschidas da scolas professiunalas ed associaziuns professiunalas, p.ex. da la Cuminanza d'interess construiders d'instruments da musica IGMIB, da l'Associaziun svizra dals construiders e dals accordaders da clavazins SVKS u da l'Associaziun svizra dals maisters scrinaris e fabricants da mobiglias ASSFM

Scola auta spezialisada (SAS)

studi en direcziuns spezialas parentadas, p.ex. Bachelor of Arts (SAS) en design da products e d'industria u Bachelor of Science (SAS) en tecnica da lain

A l'exteriur

diplom federal da maister / maistra en las direcziuns spezialas: construcziun da clavazins e Cembalos, construcziun d'orglas ed armoniums, construcziun d'instruments a flad da lain e da metal a la scola spezialisada per construcziun d'instruments a Ludwigsburg/Germania.

Cundiziuns da lavur

Construiders d'instruments da musica lavuran en lavuratoris, ateliers ed affars spezialisads. Il martgà da lavur en Svizra è pitschen, mo la dumonda da spezialists talentads è stabila. La dumonda naziunala ed internaziunala dad instruments a flad da sturs e parts da quests instruments è gronda. En Svizra s'occupan circa 60 manaschis pitschens cun la reparatura d'instruments a flad, circa la mesadad porscha plazzas d'emprendissadi. Dals var 250 construiders da clavazin scoleschan circa 20 manaschis emprendists. Construids vegnan clavazins mo pli en il lavuratori per la construcziun da clavazins al BBZ Arenenberg. Var 10 manaschis da la construcziun d'orglas porschan plazzas d'emprendissadi sco construider d'orglas, en tscherts manaschis da la construcziun d'orglas sco er en in manaschi spezialisà datti la pussaivladad d'emprender da construir tschivlots d'orgla. Suenter plirs onns experientscha professiunala e cun l'engaschament necessari han spezialists la pussaivladad d'avrir in agen atelier.

Ulteriuras infurmaziuns

Cuminanza d'interess construiders d'instruments da musica
c/o Elin Office AG
Amthausgasse 3
3011 Berna
Tel: 031 313 20 00
URL: www.musikinstrumentenbauer.ch




orientamento.ch