Lavurs
Creaders e creadras da textilias interiuras lavuran en manaschis da la decoraziun d’interiurs. Els èn responsabels per la producziun da sumbrivals, rauba da letg, surtratgas per pulstrads e plimatschs sco er per elements da decoraziun. Ultra da quai cusseglian els la clientella e dattan tips per l’equipament da l’interiur.
Ils products da las creaders da textilias interiuras èn per regla fabricaziuns unicas. Las tailas preziusas pretendan ina buna planisaziun ed elavuraziun. L’emprim vegn la taila fatga or cun il fier per ch’ella possia suenter vegnir mesirada e tagliada a moda exacta. Suenter che la taila è vegnida tagliada vegn ella fixada e cusida u a maun u cun la maschina da cuser industriala.
Il cuser cun la maschina è la part impurtanta da la lavur da creaders da textilias interiuras. Savens è er dumandada lavur a maun, per exempel tar il cuser volants, posamentaria e pizs sco er rintgs, glischnaders e crutschs per sumbrivals. Impurtants utensils a maun èn il meter dubel, il squader sco er forschs e guglias da cuser.
Sper las differentas tailas elavuran creaders da textilias interiuras er tgirom e material d’emplenir che vegn per exempel duvrà per surtratgas vattadas u per rauba da letg. Sper la producziun dals products per l’equipament da l’interiur surpiglian els er la montascha da sistems da sumbrivals ed auters sistems da far sumbriva.
Creaders da textilias interiuras cusseglian lur clientella a moda cumpetenta ed amiaivla. Els taidlan ils giavischs, fan propostas ponderadas, fan offertas e regleschan las incumbensas a moda professiunala. Durant la lavur dal mintgadi tegnan els net lur lieu da lavur e resguardan las prescripziuns da la protecziun da l’ambient, da la sanadad e da la segirezza da la lavur.
Scolaziun
Basa legala
Ordinaziun federala 31-5-2010
Durada
3 onns
Furmaziun en la pratica
En in manaschi da decoraziuns d’interiurs
Furmaziun en scola
1 di per emna a la scola professiunala
Roms professiunals
- cussegliaziun e vendita
- confecziun
- segirezza da la lavur
- protecziun da la sanadad
- protecziun da l’ambient
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "creader / creadra da textilias interiuras AFQ"
Premissas
Furmaziun preliminara
- scola populara terminada
Pretensiuns
- inschign manual
- senn per colurs e furmas
- mauns inschignaivels per lavurar a moda exacta
- nagin disturbi da la vesida da colurs
- pazienza e premura
- imaginaziun dal spazi
Furmaziun supplementara
Curs
purschidas da scolas spezialisadas e professiunalas, dad interieursuisse sco er da manaschis da furniziun
Examen professiunal (EP)
creader / creadra da textilias interiuras, cussegliader / cussegliadra d’indrizs interns, colurist / colurista
Examen professiunal superiur (EPS)
dipl. decoratur / decoratura d’interiurs
Scola spezialisada superiura (SSS)
studis en secturs spezials parentads, p.ex. tecnicist diplomà / tecnicista diplomada SSS textil, tecnicist diplomà / tecnicista diplomada SSS planisaziun da construcziun (approfundaziun architectura d’interiurs) u creader diplomà / creadra diplomada SSS design industrial (approfundaziun design textil)
Scola auta spezialisada (SAS)
studis en secturs spezials parentads, p.ex. Bachelor of Arts (SAS) en architectura interiura, Bachelor of Arts (SAS) en design industrial e textil
Cundiziuns da lavur
Creaders da textilias interiuras lavuran savens en manaschis da decoraziun interiura. Patruns pussaivels èn dentant er negozis gronds u chasas da mobiglias cun agen atelier da cuser sco er manaschis da producziun da la branscha da mobiglias e textilias. Creaders da textilias interiuras èn spezialists tschertgads sin il martgà da lavur.
Ulteriuras infurmaziuns
Interieursuisse
Eichholzstr. 11
Chascha postala 428
2545 Selzach
Tel: 032 641 66 10
URL: www.interieursuisse.ch
Revista professiunala:
"interieur"