Lavurs
Concepidras e concepiders da tessids sviluppan e taissan tailas cun agid da talers a maun e talers dirigids dal computer. Els elavuran fibras natiralas sco launa, mangola, taila da glin e saida sco era fibras artifizialas e materials betg textils.
Els produceschan tailas da gronda qualitad per vestgadira, accessoris u textilias interiuras (rauba da maisa, sumbrivals, tailas per mobiglias e tarpuns). Els porschan era tessids spezials per objects d’art u per costums.
Concepiders da tessids sviluppeschan lur products tenor atgnas ideas u tenor ils giavischs da la clientella. Sin palpiri u al computer elavuran els skizzas e plans. Els ston avair enconuschientschas da la teoria da las colurs e da las pussaivladads da concepziun. Tut tenor la qualitad giavischada tschernan els il material e la structura dal tessì. Plinavant dissegnan els ina patrona, quai vul dir in dissegn tecnic, che facilitescha l’installaziun dal taler. L’installaziun cumpiglia pliras fasas da lavur che precedan il process da taisser.
Cun il tractament posteriur obtegn il tessì sia qualitad definitiva. Concepiders da tessids utiliseschan per quai metodas da lavar, decatar e far vegnir grugl. Els elavuran e cusan las tailas tut tenor l'artitgel e l’incumbensa dal client. Ultra da quai preschentan els ils products en l'agen affar sco era sin fieras ed exposiziuns e quai a moda attractiva e persvadenta.
Durant la producziun lavuran concepiders da tessids a moda professiunala e conscienziusa cun ils talers ed auters apparats tecnics. Els enconuschan la procedura e pon eliminar pitschens sbagls. En il mintgadi professiunal tractan els las resursas cun premura e resguardan las prescripziuns davart la protecziun da l’ambient, la protecziun da la sanadad e la segirezza da la lavur.
Scolaziun
Basa legala
Ordinaziun federala 26-5-2010
Durada
3 onns
Furmaziun en la pratica
en ina tessaria a maun u al Centro scolastico per le industrie artistiche, Lugano (scolaziun a temp cumplain, talian sco lingua d’instrucziun)
Furmaziun en scola
Curs da bloc a la scola professiunala Sta. Maria/Val Müstair (Scola Industriala): 3 blocs per onn, mintgamai 2 emnas
Roms professiunals
- concepir e planisar incumbensas e projects
- realisar incumbensas e projects
- segirezza da la lavur, protecziun da la sanadad, protecziun da l’ambient e mantegniment da la valur
Curs ordaifer il manaschi
Davart differents temas
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "concepider / concepidra da tessids AFQ"
Premissas
Furmaziun preliminara
- scola populara terminada
- Centro scolastico per le industrie artistiche, Lugano: bunas enconuschientschas dal talian, curs preliminar d’art applitgà u propedeuticum d’art applitgà (per ordinari 1 onn) ad ina scola d’art applitgà u ad ina scola auta spezialisada ubain ina furmaziun preliminara d’art applitgà equivalenta
Pretensiuns
- inschign manual
- dun da designar
- imaginaziun dal spazi
- enclegientscha tecnica
- senn per colurs e furmas
- creativitad
- pazienza e perseveranza
- constituziun sauna e ferma
- patratgar a moda orientada a la clientella
Furmaziun supplementara
Curs
purschidas da scolas professiunalas e scolas spezialisadas, da scolas d’art applitgà sco era d’associaziuns professiunalas
Scola spezialisada superiura (SSS)
curs da furmaziun en il sectur da textilias, p.ex. tecnicist / tecnicista SSS textil
Scola auta spezialisada (SAS)
direcziuns da studi en secturs parentads, p.ex. Bachelor/Master of Arts (SAS) en conservaziun e restauraziun cun approfundaziun textil u Bachelor/Master of Arts (SAS) en l’intermediaziun d’art e design
Cundiziuns da lavur
Concepiders da tessids lavuran en ateliers da taisser. La purschida da plazzas da lavur e pitschna. Ulteriuras pussaivladads d’engaschament porschan l’industria da textilias, scolas, purschiders da curs ed ateliers terapeutics, sporadicamain era museums, nua che tessids antics vegnan restaurads.
Concepiders da tessids sa profileschan cun in patratgar ed agir creativ, enclegientscha tecnica ed imaginaziun dal spazi. Els èn averts per trends actuals da la moda e da la concepziun d’interiurs. Els resguardan ils giavischs spezials da la clientella e ston eruir nischas dal martgà e las avrir a moda raschunaivla.
Ulteriuras infurmaziuns
Societad d'interess IGW
Geschäftsstelle
Unterzelgweg 4
3672 Aeschlen b. Oberdiessbach
Tel: 077 482 03 99
URL: www.textilforum.ch
Scola Industriala Val Müstair
7536 Sta. Maria VM
Tel: 081 858 55 35
Centro scolastico per le industrie artistiche
Via Brentani 18
6904 Lugano
Tel: 091 815 20 11
URL: www.csia.ch