Lavurs
Muliners e mulineras vegnan scolads en las direcziuns spezialas victualias e victualias d’animals. Muliners da victualias molan graun tar farina, semulina u flocs d’ensolver. Els enconuschan las differentas sorts da graun e las pussaivladads tecnicas da lur mulin. Els san dentant er co che las farinas vegnan duvradas en pasternarias ed en las chasadas. Uschia pon els producir products ch’adempleschan las differentas pretensiuns.
Muliners da la direcziun speziala victualias d’animals produceschan pavel d’animals or da graun, favs u autra materia supplementara. Tut tenor spezia d’animal e finamira da nutriment vegnan ils products primars maschadads, preparads e tut tenor basegn smatgads en pitschens quadrins. Ils spezialists enconuschan las qualitads da nutriment dals products ed ils basegns da nutriment da differentas spezias d’animals. Ils products da lur mulins u dals implants da pavel maschadà adatteschan els cuntinuadamain als basegns da la clientella.
En il mintgadi da lavur prendan ils muliners cunter il graun e controlleschan la qualitad. Lura vegn il graun nettegià e conservà enfin l’elavuraziun ulteriura. Tut tenor product final vegn el lura maschadà e mieut. Las lavurs vegnan per gronda part manadas tras cun indrizs automatisads ed èn suttamessas a prescripziuns d’igiena e qualitad fitg strictas. Ils muliners planiseschan, dirigian e controlleschan la producziun. Els prendan cuntinuadamain provas e las controlleschan. Ultra da quai ston els mintgatant recuperar disturbis durant il process da producziun. Cura che la rauba è elavurada, vegn ella emplenida en ils indrizs da satgera en satgs e preparada per il transport.
Scolaziun
Basa legala
Ordinaziun federala 4-11-2011 cun midadas ils 1-1-2014 ed ils 5-11-2015
Durada
3 onns
Direcziuns
- victualias
- victualias d’animals
Furmaziun en la pratica
En in mulin u en in implant per pavel maschadà
Furmaziun en scola
Quatter curs da bloc da 2 - 3 emnas per onn el Center da professiun e furmaziun Wil-Uzwil
Roms professiunals
- prender cunter ed administrar rauba
- products da graun/producir victualias d’animals
- qualitad, igiena, mantegniment, segirezza da la lavur, garantir la protecziun da l’ambient
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "muliner / muliner AFQ"
Premissas
Furmaziun preliminara
- scola populara terminada
Pretensiuns
- plaschair vi da products natirals
- interess vi da process biologics, fisicals e chemics
- interess da s’occupar cun maschinas
- enclegientscha tecnica
- bun dun d’observaziun
- senn per igiena
- ferma constituziun
- buna sanadad (naginas allergias)
- bun nas e bun palp
- prontadad da lavurar irregularmain
Furmaziun supplementara
Emprendissadi supplementar
muliner /muliner AFQ da la segunda direcziun speziala (1 onn)
Furmaziuns supplementaras en Svizra
- tecnicist muliner / tecnicista mulinera a la Schweizerische Müllereifachschule Son Gagl
- tecnicist / tecnicista da pavel maschadà a la scola per tecnica da pavel ad Uzwil
Scola spezialisada superiura (SSS)
tecnicist / tecnicista dipl. SSS tecnologia da victualias
Scola auta spezialisada (SAS)
Bachelor of Science (SAS) en tecnologia da victualias
Scolaziuns en Germania
- spezialist / spezialista silo da graun
- manager / managera da graun, scolaziun spezialisada economia da magasins
- maister muliner / maistra muliner (a la Meisterschule a Hoppenlau / Stuttgart u a la Deutsche Müllerschule Braunschweig)
Cundiziuns da lavur
Muliners han per gronda part temp da lavur regulà, en tscherts manaschis lavuran els en lavur da duas squadras. En Svizra datti radund 130 mulins. Ina midada en manaschis da producziun parentads per exempel en la producziun da victualias è pussaivla. Muliners han bunas schanzas sin il martgà da lavur, damai che la dumonda suenter spezialists qualifitgads è gronda. Ultra da quai èn els era tschertgads a l’exteriur sco persunas dal fatg.
Ulteriuras infurmaziuns
Schweizerischer Verein Arbeitswelt Müller/in
Bernstr. 55
Chascha postala 737
3052 Zollikofen
Tel: 031 915 21 11
URL: www.mueller-in.ch