Lavurs
Assistents ed assistentas per sanadad e fatgs socials assistan carstgauns che han basegn d’agid en lur mintgadi. Els lavuran en centers d’attempads e da tgira, en instituziuns per persunas cun impediments, en ospitals e clinicas u tar la spitex.
Assistentas per sanadad e fatgs socials sustegnan lur clients en lur tgira da la sanadad e dal corp: Ellas als gidan a sa vestgir ed a sa svestgir, a far laschiva, a far la barba u sin tualetta. Cun agid da spassegiadas ed exercizis procuran ellas ch’ils clients sa movan suffizientamain. Ellas fan attenziun che las persunas che dovran tgira giaschian uschè empernaivel sco pussibel. Ellas controlleschan lur puls, la respiraziun e la temperatura. Sch’insatge dat en egl, infurmeschan ellas il persunal responsabel per la tgira e dattan emprim agid en cas d’urgenza.
Assistentas per sanadad e fatgs socials gidan ils clients en il tegnairchasa. Ellas fan si il letg, fan laschiva, fan urden en las chombras ed exequeschan lavurs pitschnas da nettegiar. Ellas preparan té e marendas, als servan ed assistan durant las tschaveras. Ultra da quai bognan ellas las plantas, fan cumissiuns ed accumpognan lur clients a termins. Integrond lur clients en tut quellas activitads promovan ellas l’autonomia ed il plaschair da viver da lur clients.
Assistentas per sanadad e fatgs socials liquideschan lavurs administrativas pitschnas al computer. Ultra da quai nettegian e mantegnan ellas apparats ed utensils. Assistentas per sanadad e fatgs socials exequeschan la gronda part da la lavur en in team e tenor las instrucziuns da lur superiurs.
Durant la lavur resguardan assistentas per sanadad e fatgs socials las prescripziuns davart l’igiena e davart la protecziun da la sanadad. Ellas fan attenziun a lur atgna segirezza ed eviteschan accidents da lur clients.
Scolaziun
Basa legala
Ordinaziun federala 20-12-2010 (stan dals 1-1-2018)
Durada
2 onns
Furmaziun en la pratica
en in’instituziun dals fatgs da sanadad u dals fatgs socials
Furmaziun en scola
1 di per emna a la scola professiunala
Roms professiunals
- collavuraziun e sustegn tar la tgira da la sanadad e tar la tgira dal corp
- accumpagnament e sustegn da clients e clientas en il mintgadi
- sustegn en il tegnairchasa
- realisaziun da las prescripziuns da l’igiena e da la segirezza
- collavuraziun tar l’administraziun
- logistica
- organisaziun da la lavur
- svilup ed observaziun da rollas da la vita professiunala e cooperaziun
Curs ordaifer il manaschi
tar differents temas
Diplom
Attestat federal professiunal "assistent / assistenta per sanadad e fatgs socials AFP"
Premissas
Furmaziun preliminara
- scola populara terminada cun pre-tensiuns fundamentalas
- enconuschientschas dal tudestg a bucca ed en scrit
- enclegientscha dal dialect svizzer
Pretensiuns
- plaschair vi dal contact cun carst-gauns
- plaschair vi da lavurs dal tegnair-chasa e vi da lavurs praticas
- empatia e servetschaivladad
- pazienza e respect
- abilitad da lavurar en in team e da communitgar
- senn da responsabladad
- senn per l’igiena e per l’urden
- buna sanadad corporala e mentala, abilitad da supportar squitsch
Furmaziun supplementara
Curs
purschidas da scolas professiunalas e d’associaziuns professiunalas
Spezialist / Spezialista per la sanadad AFQ u Spezialist / Spezialista da tgira AFQ
Assistents per sanadad e fatgs socials AFP pon sa qualifitgar per ina furmaziun da basa scursanida sco spezialist / spezialista per la sanadad cun attestat federal da qualificaziun (AFQ) u sco spezialist / spezialista da tgira AFQ (entrada al 2. onn da furmaziun da basa).
Silsuenter han ellas las medemas pussaivladads da furmaziun supplementara sco spezialists / spezialistas per la sanadad AFQ resp. sco spezialists / spezialistas da tgira AFQ.
Cundiziuns da lavur
Assistentas per sanadad e fatgs socials lavuran en la domena staziunara ed en la domena ambulanta. Ellas pon per exempel esser occupadas en asils d’attempads u da tgira, en chasas per persunas cun impediments, en centers da reabilitaziun, en clinicas psichiatricas u tar la spitex.
Lur temp da lavur n’è savens betg regular. Tut tenor il lieu da lavur ston ellas quintar cun servetsch da notg u da la fin d’emna. Igl è pussaivel da lavurar a temp parzial.
En il sectur da tgira e d’assistenza manca savens persunal qualifitgà. Assistentas per sanadad e fatgs socials èn perquai tschertgadas en chasas da tgira e d’attempads.
Per creschids existan en tscherts chantuns pussaivladads per laschar quintar vitiers ina furmaziun preliminara resp. pratica professiunala en il sectur da tgira e d’assistenza.
Ulteriuras infurmaziuns
OdASanté, Nationale Dachorganisation der Arbeitswelt Gesundheit
Seilerstr. 22
3011 Bern
Tel: 031 380 88 88
URL: www.odasante.ch
SAVOIRSOCIAL
Schweiz. Dachorganisation der Arbeitswelt Soziales
Amtshausquai 21
4600 Olten
Tel: 031 371 36 25
URL: www.savoirsocial.ch
Survista professiuns en il sectur da sanadad:
URL: www.gesundheitsberufe.ch