Practicist / Practicista da mecanica AFP

Practicists e practicistas da mecanica gidan a fabritgar utensils, maschinas e tocca da construcziun. Els elavureschan metals e construeschan maschinas ed utensils. Els lavuran en ina gruppa ed exequeschan lavurs simplas a moda autonoma.

Practicists da mecanica exequeschan incumbensas da l’entschatta fin a la fin. Sco emprim legian els ils documents da l’incumbensa e planiseschan ils pass da lavur. Els preparan ils utensils e las maschinas necessarias a la plazza da lavur. Els fan attenziun ch’els resguardian las prescripziuns.

Practicists da mecanica construeschan tocca singula da construcziun or da metals sco atschal, atschal cromà u aluminium. Els lavuran a maun e cun maschinas da turnar, fresar, furar e mular. Els storschan, perforan, squadran, lutegian e rebattan. Ultra da quai utiliseschan els maschinas dirigidas dal computer ch’èn programmadas ed endrizzadas da lur superiurs. Els surveglian la producziun conscienziusamain ed examineschan la qualitad da la tocca singula cun agid d’instruments da mesiraziun e da controlla.

Practicists da mecanica monteschan era utensils e maschinas simplas sco per exempel maschinas da furar. Els construeschan tocca singula e furman qua tras in entir che funcziuna. Tar tut quai resguardan els las prescripziuns dals documents da montascha e las directivas da lur superiurs. Ils practicists da mecanica gidan ultra da quai da reparar e mantegnair tocca da construcziun ed exequeschan las reparaturas ed ils remplazzaments adequats.

Durant lur lavur sa tegnan practicists da mecanica adina vi da las prescripziuns: Els èn attents a la segirezza ed a la protecziun da la sanadad e da l’ambient. Els portan per exempel guants ed egliers da segirezza. Els allontaneschan ruments sco ieli vegl, aua da sfradentar u stalizzas da metal a moda professiunala.