Lavurs
Assistents ed assistentas per il mantegniment d'autos lavuran en ina garascha d’autos. Els controlleschan e repareschan il vehichel dadens e dadora. Els controlleschan motors, propulsiuns e schassis. Il schassis consista da rodas e pneus, da suspensiun e moderaziun, da manischadi e suspensiun da las rodas sco era da frains.
Assistents per il mantegniment d'autos midan l’ieli, mesiran il livel da l’ieli ed unschan cun grass tocca movibla dal motor. Els tgiran il sistem da sfradentar il motor e l’indriz da controllar las svapurs. Els controlleschan, midan or e chargian las battarias. Indrizs d’illuminaziun e da signals egualiseschan els a moda correcta. Rodas e pneus veders remplazzan els cumpetentamain. Cun l’instrucziun dals spezialists d’autos superiurs remplazzan els ultra da quai era parts dals frains, manischadi e suspensiun da las rodas.
Assistents per il mantegniment d'autos mantegnan guaffens, maschinas ed indrizs en lavuratoris. Els lavuran cun guaffens sco clavs da struvas, maschinas da furar e zangas. Els tractan metals cun maschinas da mular, apparats da buglir e da lutegiar.
Per evitar accidents ston assistents per il mantegniment d'autos lavurar a moda exacta. Els resguardan las prescripziuns da segirtad e da protecziun da la sanadad. Els magasineschan e dismettan a moda ecologia battarias, pneus, metals u sdratschs da nettegiar. Ultra da quai empostan els tocca da reserva.
Scolaziun
Basa legala
Ordinaziun federala 12-10-2017
Durada
2 onns
Furmaziun en la pratica
En ina garascha d’autos
Furmaziun en scola
1 di per emna a la scola professiunala
Roms professiunals
- controllar e tgirar vehichels
- midar tocca isada
- sustegnair la procedura dal manaschi
Curs ordaifer il manaschi
Lavurar ed exercitar a moda pratica vi da lavurs da basa
Diplom
Attestat federal da qualificaziun "assistent / assistenta per il mantegniment d'autos AFP"
Premissas
Furmaziun preliminara
- scola populara terminada
- test da qualificaziun AGVS
Pretensiuns
- enclegientscha tecnica
- inschign manual
- moda da lavur exacta e precisa
- fidadadad e senn per responsabladad
Furmaziun supplementara
Curs
purschidas da l’Uniun professiunala svizra da l’automobil (AGVS) e da scolas professiunalas
Spezialist / Spezialista d’autos AFQ
Assistents ed assistentas per il mantegniment d'autos AFP pon far ina scolaziun da basa scursanida sco spezialist / spezialista d’autos AFQ cun attest federal da qualificaziun (access en il 2. onn da la furmaziun da basa professiunala).
Silsuenter valan las medemas pussaivladads da furmaziun supplementara sco per ils spezialists / las spezialistas d’autos AFQ.
Cundiziuns da lavur
Assistents per il mantegniment d'autos lavuran en lavuratoris d’autos ed en garaschas.
Els han per ordinari in temp da lavur reglà e lavuran 5 dis per emna. En manaschis cun agid en cas da panna e servetsch da pichet valan temps da lavur spezials.
Ulteriuras infurmaziuns
Auto Gewerbe Verband Schweiz (AGVS)
Wölflistr. 5
Postfach 64
3000 Bern 22
Tel: 031 307 15 15
URL: www.agvs.ch
Revista professiunala:
"AutoInside"