Lavurs
Gidantras e gidanters da restauraziun lavuran en in restaurant. Els guardan ch'ils giasts passentan bellas uras en ina buna atmosfera. Els cuvran las maisas per occurrenzas spezialas, sco per exempel per festas. Els pondereschan tge vaschella, tge pusada e tge magiels che van a prà cun l'eveniment. Ultra da quai decoreschan els las maisas cun flurs ed autras garnituras. Els lavuran adina a moda netta.
Gidanters da restauraziun salidan ils giasts curtaschaivlamain ed als accumpognan a la maisa. Els portan la carta da tratgas e decleran las spezialitads dal di.
Gidanters da restauraziun san servir spaisas e bavrondas a moda professiunala. Els observan attentamain tge giavischs ch'ils giasts han e cura ch'els dastgan purtar paun u dustar giud maisa. Suenter la tschavera stampan els il quint ed al dattan al giast.
Al buffet preparan gidanters da restauraziun spaisas e bavrondas. Els lavuran er en il magasin e guardan là per urden. Ultra da quai nettegian els mobiglias, apparaturas ed endrizzaments.
Gidanters da restauraziun han bunas demananzas ed èn persunas fidadas. Perfin en situaziuns hecticas na perdan els betg la survista ed il ruaus. Sco commember d'in team taidlan els sin il superiur, lavuran però er a moda autonoma.
Scolaziun
Basa legala
Ordinaziun federala 7-12-2004
Durada
2 onns
Furmaziun en la pratica
En in restaurant, in hotel u in manaschi che porscha gastronomia da sistem e da cuminanza (restaurant da persunal)
Furmaziun en scola
da chantun a chantun different:
- 1 di l'emna a la scola professiunala u
- 2 curs professiunals interchantunals (mintgamai 5 emnas) l'onn en in hotel da scola da hotelleriesuisse
Roms professiunals
- economia da manaschi
- organisaziun da manaschi
- igiena
- segirezza da la lavur / protecziun da la sanadad
- mantegniment da la valur
- logistica
- enconuschientschas da victualias e bavrondas
- accumpagnament dals giasts
- cumportament
- vendita
- producziun
Curs ordaifer il manaschi
Davart differents temas
Diplom
Attestat federal professiunal "gidanter / gidantra da restauraziun AFP"
Premissas
Furmaziun preliminara
- scola populara terminada
Pretensiuns
- plaschair dal contact cun giasts
- prontadad da servetschs
- cumparsa cultivada
- buna demananza e cumparsa amicabla
- persuna exacta e fidada
- abilitad da supportar squitsch
- abilitad da lavurar en in team
- conscienza d'igiena
- buna sanadad
Furmaziun supplementara
Curs
Associaziuns professiunalas porschan curs davart differents temas.
Spezialist / Spezialista da restauraziuns AFQ
Gidanters da restauraziun pon far ina furmaziun da basa scursanida sco spezialists da restauraziuns AFQ (access al segund onn da la furmaziun da basa). Suenter han els las medemas pussaivladads da furmaziun supplementara sco spezialists da restauraziuns AFQ.
Cundiziuns da lavur
Gidanters da restauraziun lavuran en restaurants, en hotels u en restaurants da persunal. Il temp da lavur è savens irregular e po durar fin tard la saira. Blers lavuran era las dumengias ed ils firads.
Gidanters da restauraziun futurs duain tschertgar a moda intensiva ina plazza d'emprendissadi ed er esser pronts da frequentar la furmaziun da basa en territoris rurals u da turissem.
La bursa da fufragnadis e d'emprendissadis da la branscha (www.berufehotelgastro.ch) gida persunas interessadas da tschertgar purschidas en tut las regiuns linguisticas da la Svizra.
Ulteriuras infurmaziuns
GastroSuisse associaziun per hotellaria e restauraziun
Blumenfeldstr. 20
Chascha postala
8046 Turitg
Tel: 0848 377 111
URL: www.berufehotelgastro.ch
Hotelleriesuisse
Marketing e vendita Furmaziun
Monbijoustr. 130
Chascha postala
3001 Berna
Tel: 031 370 42 83
URL: www.berufehotelgastro.ch