Vai al titolo

Tecnicist / Tecnicista da dents AFQ

Tecnicists e tecnicistas da dents produceschan protesas ed apparaturas da l’ortopedia da la missella sco denteras, punts dentalas per remplazzar dents che mancan u per curreger la posiziun da la missella manglusa. Els èn er responsabels per adattaziuns e reparaturas e garanteschan che las protesas ed apparaturas sajan confurmas a la funcziun e confortablas da purtar.

Lavurs

Els exequeschan suandantas lavurs:

Preparaziun ed elavuraziun
  • cular ord in gip spezial (cun agid da las improntas ch’il dentist ha fatg) in exact model da la missella da la pazienta
  • reciclar u dismetter il rument tenor las prescripziuns da l’ambient
Producir curunas e punts
  • far ord il model da gip dal pazient furmas
  • cular metal luà sco aur u liament
  • laschar sfradentar, adattar e pulir las curunas finidas
  • dar si cheramica sin las curunas e las brischar per furmar ils dents
  • mular giu las surfatschas
  • far stim tar la cheramica che la colur dal dent artifizial giaja a prà cun ils dents da la pazienta
Preparar las protesas
  • eleger ensemen cun la pazienta e la dentista la furma e colur da la protesa
  • montar ils model en in articulatur (apparat che imitescha ils moviments da la missella) ed als adattar per controllar ils differents moviments da la missella
  • far ina construcziun da metal e fixar vid quella ils dents artifizials; modellar, mular, pulir, tatgar sco er stgaudar materia sintetica, rascha e cheramica.
  • fabritgar protesas cumplainas per persunas senza dents
  • assister al dentist tar l’emprova da la protesa vid il pazient ed adattar la protesa sch’i fa basegn
Elavurar apparaturas da l’ortopedia da la missella
  • elavurar apparaturas da l’ortopedia da la missella per curreger posiziuns manglusas dals dents u furmaziuns manglusas da la missella
  • producir glischneras da plastic ch’èn improntas reflectadas da las furmas e da la posiziun dals dents

Scolaziun

Durada

4 onns

Furmaziun en la pratica

En in labor dental

Furmaziun en scola

1 di per emna a la scola professiunala

Roms professiunals

  • organisar ils process da lavur
  • producir remplazzaments da dents demontabels
  • producir remplazzaments da dents stabels
  • producir apparaturas e lingias ortopedicas da la missella
  • exequir lavurs da tractament posteriur, prestaziuns da service, reparaturas e schlargiaments
  • Curs ordaifer il manaschi

    Emprender ed exercitar a moda pratica la basa professiunala. 33 dis durant 4 onns.

    Maturitad professiunala

    Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

    Diplom

    Attestat federal da qualificaziun "tecnicist / tecnicista da dents AFQ"

Premissas

Furmaziun preliminara
  • temp da scola obligatoric terminà
  • Swiss Dental Laboratories porscha in test da qualificaziun e recumonda d’absolver in fufragnadi.
Pretensiuns
  • interess vi d’anatomia, chemia e fisica
  • plaschair vi da la lavur da precisiun
  • pazienza e perseveranza
  • inschign manual
  • bun dun d’observaziun
  • buna vesida da colurs
  • abilitad da s’imaginar chaussas en il spazi
  • senn per colurs e furmas
  • talent d’organisar process da lavur, bun timing
  • naginas allergias en connex cun chemicalias
  • demananza orientada a la clientella e prontadad da s’engaschar

Furmaziun supplementara

Curs

purschidas d’associaziuns professiunalas, firmas dentalas sco er instituts dentals d’universitads

Examen professiunal (EP)

tecnicist/tecnicista da dents spezialisà  en l'ortopedia da la missella cun attestat federal da qualificaziun

Cundiziuns da lavur

Tecnicists da dents lavuran persuls u en pitschens teams en labors dentals, en praticas da dentists, en clinicas universitaras e clinicas da scola sco er en l’industria dentala. Els produceschan singuls elements a maun e lavuran stretgamain cun dentistas e dentists. Els portan vestgadira da protecziun  e tar tschertas lavurs er egliers da protecziun.

En ils gronds laboratoris da dents pon els sa spezialisar sin in tschert sectur, sco per exempel sin la cheramica, sin l’ortopedia da la missella u dal cular models ed els pon surpigliar cun experientscha da lavur creschenta posiziuns da responsabladad. I è pussaivel da fundar in agen manaschi, mo quai pretenda grondas investiziuns. Per pudair tegnair pass al svilup tecnologic sa furman las persunas da professiun vinavant cuntinuadamain.

Ulteriuras infurmaziuns

Schweizerische Zahntechnik-Vereinigung SZV
5436 Würenlos
Tel: +41 56 500 20 60
URL: www.szv.ch

Höhere Fachausbildung für Zahntechnik HFZ
6300 Zug
Tel: +41 728 30 30
URL: www.hfz.lqc.ch

Swiss Dental Laboratories
3007 Bern
Tel: +41 31 381 64 50
URL: www.vzls.ch



orientamento.ch