Spezialist / Spezialista d’infurmaziun e documentaziun AFQ

Spezialists e spezialistas d’infurmaziun e documentaziun lavuran en partiziuns da documentaziun da bancas, assicuranzas ed administraziuns publicas, en archivs privats e publics, en bibliotecas communalas, municipalas e chantunalas, en bibliotecas d’instituts e d’universitads sco era en interpresas da medias. Els s’occupeschan da l’elavuraziun e da la communicaziun d’infurmaziuns e da purtaders d’infurmaziun e datas.

En lieus da lavur fitg differents sa fatschentan spezialistas d’infurmaziun e documentaziun I+D cun differentas infurmaziuns e cun purtaders d’infurmaziun. En archivs lavuran ellas oravant tut cun actas e dossiers en furma electronica. En bibliotecas publicas èn cunzunt DVDs, cudeschs e documents digitals d’impurtanza. En bibliotecas scientificas lavuran las persunas spezialisadas cun cudeschs da perscrutaziun sco era cun revistas electronicas. En posts da documentaziun s’occupeschan ellas cunzunt cun retschertgas e l’elavuraziun da dossiers tematics.

Spezialistas I+D prendan part a la furmaziun da secziuns d’archiv da medias. Ellas empostan medias en librarias, en l’internet u directamain tar l’autur u tar l’autura. Per pudair chattar las medias e las infurmaziuns pli tard las rendan ellas accessiblas. Ellas registreschan il titel ed autras indicaziuns d’in document tenor reglas da cataloghisar en ina banca da datas. Al document fisic dattan ellas ina signatura. Tar ils pensums da spezialistas d’infurmaziun e documentaziun tutga era l’ordinaziun e la conservaziun adequata da las medias.

Las datas rimnadas cuntanschan lur intent pir cura che ellas vegnan utilisadas. Las spezialistas I+D sustegnan ils utilisaders e las utilisadras en lur retschertgas, als explitgan ils catalogs, las bancas da datas ed ulteriurs instruments da retschertga ed emprestan documents. En bibliotecas publicas u bibliotecas da scola sa participeschan ellas per exempel ad introducziuns per classas ed organiseschan vernissaschas da cudeschs.

La retschertga èn ina lavur centrala da spezialistas I+D: Ellas tschertgan novas medias per la cumpra sco era exemplars gia acquistads davart temas specifics per ils clients. Spezialistas I+D lavuran independentamain cun differentas datas da banca differentas, cun catalogs da la cuminanza, cun raits e sur l’internet.