Lavurs
Spezialists e spezialistas da transport lavuran en ils suandants secturs da transport: transports spezials, transports da la logistica da construcziun e transports da dismessa. Ultra da quai transportan els rauba a toc, animals, mobiglias, aliments sco er material d’arder e carburant. Els èn responsabels per tut las lavurs tranter la planisaziun da l’incumbensa e la furniziun.
Avant il viadi controlleschan spezialists da transport il stadi dal vehichel attribuì. Els elegian il traject, calculeschan il temp da viadi ed il temp per chargiar en e per stgargiar. Ultra da quai controlleschan els scrittiras d’accumpagnament, scrits da furniziun e documents da duana. Els èn er responsabels ch’il med da transport vegnia chargià a moda professiunala e segira.
Spezialists da transport enconuschan las prescripziuns da transport naziunalas ed internaziunalas. Tut tenor lavur van els cun incumbensas da transport en ina regiun specifica, en l’entira Svizra u a l’exteriur. Ils viadis ch’èn savens lungs pretendan blera concentraziun. Els restan er ruassaivels sut pressiun da temp en il traffic da la citad, tar pannas u tar in accident e prendan las mesiras necessarias.
Sper transports surpiglian spezialists da transport er lavurs da nettegiar, da mantegniment e reparaturas pli pitschnas vi dal vehichel.
Spezialists da transport lavuran a moda autonoma ed èn conscients da la responsabladad. Els han plinavant in’enclegientscha tecnica, inschign manual e plaschair vi dal contact cun umans.
Scolaziun
Basa legala
Ordinaziun federala 23-8-2012
Durada
3 onns
Furmaziun en la pratica
En in manaschi da transport
Furmaziun en scola
1 di per emna a la scola professiunala
Roms professiunals
- manar tras transports
- segirar il mantegniment, garantir la segirezza e la protecziun da l’ambient
Curs ordaifer il manaschi
Tar differents temas: p.ex. curs da basa ADR/SDR, ECO e curs da segirezza da charrar, examen da plunader
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Permiss d’emprender dad ir cun auto
Cun 17 onns survegnan ils emprendists il permiss d’emprender dad ir cun auto en las categorias B, C e CE. Els vegnan accumpagnads dal scolast sin ils viadis. Suenter l’examen dad ir cun auto reussì mainan els tras incumbensas da transport a moda autonoma.
Diplom
Attestat federal da qualificaziun "spezialist / spezialista da transport AFQ"
Premissas
Furmaziun preliminara
- scola populara terminada cun pretensiuns mesaunas u autas
- ils emprendists ston avair cumplenì lur 16avel onn da naschientscha durant l’emprim onn d’emprendissadi avant il 1. da december
Pretensiuns
- enclegientscha tecnica
- inschign manual
- abilitad da metter avant chaussas a moda objectiva
- capacitad da giuditgar e da decider
- autonomia
- plaschair da contact
- talent d’organisaziun
- discreziun
- flexibilitad pertutgant temp da lavur
- fidadadad
- bun dun d’observaziun
- senn per responsabladad
- buna sanadad e fitness corporala (attestat dal medi da confidenza è necessari)
- abilitad da supportar squitsch psichic
- plaschair dad esser en viadi
- abilitad da lavurar en ina gruppa
- visita medicala tar in medi da confidenza tenor las directivas da l’admissiun al traffic
Furmaziun supplementara
Curs
purschidas dal Schweizerischer Nutzfahrzeugverband ASTAG
Spezialisaziun
incumbensas en il traffic regiunal u sco manischunz / manischunza d’autobus sco er camiunist / camiunista da camiuns tractor, tancs e transports spezials per ruments spezials resp. rauba privlusa
Scolast / scolasta d’ir cun auto
per autos, camiuns u motos
Examen professiunal (EP)
cun certificat professiunal federal: spezialist / spezialista da pneus, manischunz / manischunza d’autobus, guid / guida da viadi, disponent / disponenta transport e logistica euv.
Examen professiunal superiur (EPS)
p.ex. manader / manadra da gestiun dipl. transport e logistica
Scola auta spezialisada (SAS)
Bachelor of Science (SAS) en tecnica d’automobils, Bachelor of Science (SAS) en sistems da traffic euv.
Cundiziuns da lavur
Spezialists da transport lavuran en interpresas industrialas, interpresas da transport ed industria. Els portan malgrà lur gronda libertad ch’els han en lur professiun blera responsabladad per ils utilisaders da las vias, per lur clientella e martganzia. Il temp da lavur sa drizza a las directivas legalas e dal manaschi. Durant ils viadis a l’exteriur èsi er pussaivel ch’els na pon betg turnar a chasa.
Cun experientscha professiunala correspundenta e furmaziun supplementara pon els era lavurar sco schef / scheffa dal parc da vehichels e schef / scheffa da la garascha, sco manischunz / manischunza d’autobus u manischunz / manischunza da bus en il traffic public u privat u cun furmaziun supplementara correspundenta sco schef / scheffa da transport en manaschis gronds, disponent / disponenta da transport, manader / manadra da partiziun u manaschi resp. manader / manadra da fatschenta.
Ulteriuras infurmaziuns
ASTAG Schweiz. Nutzfahrzeugverband
Wölflistr. 5
3006 Bern
URL: www.profis-on-tour.ch