Vai al titolo

Mecatronist / Mecatronista da pendicularas AFQ

Mecatronistas e mecatronists da pendicularas procuran per in manaschi segir e senza disturbis da funicularas, runals, pendicularas, telecabinas e sutgeras. Els mantegnan ils locals e las maschinas e controlleschan las prescripziuns da segirezza dals implants da pendiculara. Els controlleschan e reparan elements electrics e mecanics. Il contact cun ils giasts è fitg impurtant.

Lavurs

Lur lavurs èn las suandantas:

Mantegnair e reparar
  • planisar cura e nua ch'ins sto dar grass a tge cumponentas e nua ch'ins sto duvrar antischeladers e products anticorrusivs
  • mantegnair ils implants ed ils indrizs dal manaschi, p.ex. sugas, rollas, tracziuns, frains e regulaziuns
  • fabritgar tocs da reserva, p.ex. cun agid da stgalpers, furaders, plumins e crennadiras, d'apparats da buglir, tagliurns u smerigliadras
  • controllar las cumponentas electricas ed electronicas cun agid d'instruments da mesiraziun
  • prender mesiras, sch'i dat disturbis ed eliminar pitschens sbagls
  • emplenir glistas da controlla per pudair far rapports
Segirezza
  • observar las prescripziuns da segirezza, p.ex. per cumbatter incendis u en cas da privel da lavinas
  • chapir la previsiun da l'aura ed il rapport da lavinas e vesair eventuals privels
  • prestar agid e participar ad acziuns da salvament
  • garantir il provediment d'electricitad ed en cas d'in disturbi en la rait electrica prender las mesiras necessarias
  • far tests, sch'ils indrizs da segirezza, da telecumond e d'alarm funcziunan
  • en cas da privel serrar giu il manaschi da pendiculara
Manaschi dals implants
  • prender en funcziun ils implants da pendiculara e l'equipament da staziun
  • manischar correctamain ils apparats
  • survegliar las cumponentas mecanicas ed electricas, p.ex. l'illuminaziun, las sugas, las maschinas u las regulaziuns
Administraziun e turissem
  • infurmar ils giasts davart las purschidas da l'interpresa
  • respunder dumondas, far empustaziuns e controllar furniziuns
  • elavurar brevs ed e-mails
  • far rendaquints
  • rediger rapports d'accidents ed annunzias da donns e transferir quels als posts cumpetents

Scolaziun

Durada

4 onns (emprendissadi scursanì en ina professiun mecanica-electronica).

Furmaziun en la pratica

En ina interpresa da la branscha da pendicularas u en in manaschi da pendiculara per transportar rauba e/u persunas

Furmaziun en scola

En il Center da furmaziun da Pendicularas Svizra, Meiringen, en furma da curs da bloc

Cumpetenzas professiunals:

  • tegnair en funcziun ils indrizs da la pendiculara durant il manaschi regular
  • agir en cas da disturbis
  • inspecziunar ils indrizs da pendiculara
  • mantegnair ils indrizs da pendiculara
  • exequir lavurs en lavuratori

Curs ordaifer il manaschi

Emprender la lavur pratica, approfundar ed exercitar las basas professiunalas, 60 dis durant 4 onns.

Maturitad professiunala

En cas da fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Mecatronist / Mecatronista da pendicularas AFQ

Premissas

Furmaziun preliminara
  • terminà la scola obligatorica
Pretensiuns
  • interess per tecnica e turissem
  • pensar ed agir cumplessiv
  • enclegientscha tecnica e plaschair da s’occupar cun giasts
  • abilitad da communitgar e da schliar conflicts
  • agir a moda autonoma
  • flexibilitad
  • buna sanadad ed abilitad da supportar squitsch
  • abilitad da lavurar en ina gruppa

Furmaziun supplementara

Curs

purschida da Pendicularas Svizra sco er da scolas spezialisadas

Examen professiunal (EP)

cun certificat professiunal federal: spezialist / spezialista da pendicularas, spezialist / spezialista en servetsch da pistas e da salvament, spezialist / spezialista da mantegniment euv.

Examen professiunal superiur (EPS)

P.ex. manader / manadra dipl. da mantegniment

Scola spezialisada superiura (SSS)

P.ex. tecnicist / tecnicista dipl. SSS dad electrotecnica u tecnicist / tecnicista dipl. SSS da construcziun da maschinas

Scola auta spezialisada (SAS)

P.ex. bachelor of science (SAS) en tecnica da maschinas u en electrotecnica. Tut tenor la scola auta spezialisada valan differentas cundiziuns d'admissiun.

Cundiziuns da lavur

Mecatronistas e mecatronists da pendicularas lavuran en implants turistics sin las muntognas, en interpresas da pendiculara, dentant er en manaschis industrials cun pendicularas per transportar rauba e/u persunas. Lur temps da lavur èn regulars. Durant las fins d'emna e durant las vacanzas da scola èsi pussaivel ch'i resultian dis da lavur pli lungs. Els lavuran savens en il liber er cun plievgia, naiv u chalira.

Grazia a lur scolaziun variada han mecatronistas e mecatronists da pendicularas bunas schanzas sin il martgà da lavur. Els pon absolver furmaziuns supplementaras en ils secturs da la tecnica u da l'administraziun.

Ulteriuras infurmaziuns

Center da furmaziun da Pendicularas Svizra
Zeughausstrasse 19
3860 Meiringen
Tel: 033 972 40 00
URL: www.seilbahnen.org



orientamento.ch