Vai al titolo

Tecnolog / Tecnologa da palpiri AFQ

Tecnologas e tecnologs da palpiri AFQ produceschan palpiri e chartun a moda industriala. Els dirigian las maschinas basadas sin computers, surveglian la producziun, controlleschan la qualitad e mantegnan ils indrizs.

Lavurs

Els exequeschan suandantas lavurs:

Producir palpiri e chartun
  • calcular las quantitads necessarias da la materia prima ed auxiliara che tutga tar la producziun da mintga palpiri e chartun che vegn producì
  • preparar las materias primas per l’elavuraziun
  • producir ina maschaida bletscha da cellulosa, materia auxiliara ed aua che vegn numnada en il linguatg professiunal buglia da fibras
  • svidar la buglia da fibras en la maschina da palpiri, nua ch’il material vegn crivlà, smatgà, sientà e silsuenter zuglià sin grondas rollas
Raffinar ed emballar il palpiri
  • examinar en il labor ch’il palpiri u il chartun saja suffizientamain resistent u haja la spessezza necessaria
  • gulivar e meglierar la surfatscha u cuvrir ella cun ina surtratga
  • tagliar las rollas da palpiri en formats pli pratics ed las emballar
Controllar e survegliar las maschinas
  • nettegiar las maschinas cun nettegiaders a pressiun auta e las endrizzar per la proxima producziun
  • survegliar ils pass da lavur en la producziun ed eliminar immediat eventuals disturbis
  • leger giu las datas mesiradas e las nudar en ils protocols
  • dismetter il material che vanza a moda adattada a l'ambient

Scolaziun

Basa legala

Ordinaziun federala 17-8-2011 (versiun dal 1-1-2018)

Durada

3 onns

Furmaziun en la pratica

En ina fabrica da palpiri u da chartun en Svizra

Furmaziun en scola

2 -3 blocs d’instrucziun da 4 fin 8 emnas en il Center da palpiri a Gernsbach, Germania. Ils custs per il viadi e l'alloschi surpiglia il manaschi d’emprendissadi.

Roms professiunals

  • basas fundamentalas da chemia, fisica, tecnica da maschinas ed electrotecnica
  • preparaziun da la materia
  • producziun da palpiri, chartun e chartun ondulà

Maturitad professiunala

Fitg bunas prestaziuns da scola permettan da frequentar durant u suenter la furmaziun fundamentala ils curs da la scola professiunala a Gernsbach, Germania. Il certificat è la premissa per pudair frequentar furmaziuns supplementaras a l’exteriur vischin.

Diplom

Certificat d’examen tudestg «tecnolog / tecnologa da palpiri» (renconuschì en l’Europa). L’examen professiunal ha lieu a la scola da creaders da palpiri a Gernsbach, Germania. Ulteriur diplom: "tecnolog / tecnologa da palpiri AFQ"

Premissas

Furmaziun preliminara
  • Temp da scola obligatoric terminà
  • bunas prestaziuns en matematica ed en ils roms da la scienza natirala
Pretensiuns
  • enclegientscha tecnica
  • inschign manual
  • moda da lavurar exacta
  • bun dun d‘observaziun
  • abilitad da lavurar en in team
  • robustadad corporala

Furmaziun supplementara

Curs

purschidas da l’agen manaschi sco era purschidas dal Center da palpiri a Gernsbach, Germania, u dal Center da furmaziun Steyrermühl, Austria.

En Svizra na datti nagina furmaziun supplementara per tecnica da palpiri. Numerusas pussaivladads datti dentant sin champs parentads sco la stampa, l'emballadi, la chemia, la gestiun, euv.

Furmaziuns supplementaras a l'exteriur

  • maister / maistra d’industria direcziun elavuraziun da palpiri, producziun da palpiri u elavuraziun da materia sintetica al Center da palpiri a Gernsbach, Germania
  • tecnicist / tecnicista direcziun tecnica da palpiri en diversas scolas spezialisadas superiuras (SSS) en la Germania ed en l’Austria
  • inschigner diplomà / inschignera diplomada en tecnica da proceder cun approfundaziun en tecnica da palpiri a l’Universitad tecnica da Dresden
  • Bachelor en tecnica da palpiri e proceder  a la Scola auta spezialisada per scienzas applitgadas a Minca resp. a l’Universitad tecnica da Graz

Cundiziuns da lavur

Tecnologs da palpiri lavuran en fabricas da palpiri e da chartun, però er en manaschis da furniziun sco per exempel en l’industria da chemia, da fieuter e da recicladi. Ultra da quai pon els vegnir engaschads da producents da maschinas da palpiri. Per gronda part vegn producì da di e da notg durant set dis l'emna. Perquai fan tecnologs da palpiri lavur da squadra. La purschida da plazzas d’emprendissadi è gronda.

Ulteriuras infurmaziuns

Associaziun svizra dals patruns dals fabricants da palpiri ASPI
Bergstr. 110
8032 Turitg
Tel: +41 44 266 99 21
URL: www.papiertechnologe.ch



orientamento.ch