Vai al titolo

Spezialist / Spezialista d’occurrenzas AFQ

Spezialists e spezialistas d’occurrenzas lavuran tar concert ed events da clubs, preschentaziuns da teater ed opera, producziuns da film e televisiun e transmissiuns da video e radio. Els en responsabels per la construcziun, la demontascha e per il funcziunament da la sonorisaziun, da l’illuminaziun da projecziuns u d'autra tecnica da tribuna ed occurrenzas.

Lavurs

Els exequeschan suandantas lavurs:

Montascha e demontascha
  • studegiar e chapir ils plans tecnics e las documentaziuns dals apparats
  • planisar las installaziuns tecnicas dals locals da tribuna, exposiziun u fieras, far simplas planisaziuns da resursas (persunal, material, termins)
  • eleger, preparar u prender a fit e transportar il material al lieu da l'occurrenza
  • construir tribunas, installar ed encablar la tecnica da sonorisaziun, da l'illuminaziun e da la projecziun da videos al lieu fixà, endrizzar microfons, electronica, regulaziuns, computers, raits da datas ed auters meds d'agid
  • demontar indrizs tecnics e tribunas a la fin da l'occurrenza, far urden e transportar davent il material
Manaschi
  • adattar la tecnica d'occurrenza a las cundiziuns da l'occurrenza, p.ex. far tests cun la glisch ed il tun, adattar las tailas per las projecziuns da video
  • manischar l'illuminaziun (reflecturs,  lampas spezialas, pults da glisch)
  • manischar la sonorisaziun (rinforzaders, autpledaders, apparats da periferia, pults da maschadar)
  • manischar projecziuns da video (projecturs, cameras, player, pults da maschadar videos) ed integrar ulteriuras medias
  • manischar effects spezials sco maschinas da fim e tschajera u indrizs da laser
  • diriger e transmetter registraziuns da tun e maletg, p.ex. emissiuns da televisiun e conferenzas da video
Segirezza e mantegniment
  • enconuscher e resguardar las prescripziuns da la segirezza da la lavur e tribuna, mesirar las emissiuns e sa tegnair a las limitas
  • deponer correctamain ils apparats tecnics ed als mantegnair

Scolaziun

Basa legala

Ordinaziun federala 1-2-2011 (versiun dal 1-1-2021)

Durada

4 onns

Furmaziun en la pratica

En in manaschi d’emprendissadi

Furmaziun en scola

A la scola professiunala a Turitg u Lausanne, 2 dis per emna en il 1. e 2. onn d’emprendissadi, 1 di per emna en il 3. e 4. onn d’emprendissadi

Roms professiunals

  • montar, installar, manischar tecnica d'illuminaziun e da sonorisaziun
  • registrar, transmetter, projectar tecnica da video
  • eriger, montar, demontar, manischar construcziuns da tribunas
  • administrar medias, computers, raits da datas
  • inscenar effects spezials
  • realisar tecnica da segirezza
  • organisar, preparar e controllar il provediment d'energia
  • andaments da la producziun
  • administrar il material

Curs ordaifer il manaschi

exercitar ed approfundar ils cuntegns d'instrucziun

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "spezialist / spezialista d’occurrenzas AFQ"

Premissas

Furmaziun preliminara
  • temp da scola obligatoric terminà
Pretensiuns
  • enclegientscha tecnica
  • buna constituziun corporala (vesida da colurs, forza fisica, udida cumplaina)
  • avair nagina tema d’autezza
  • abilitad d’organisar
  • auta abilitad da lavurar en in team

Furmaziun supplementara

Curs

purschidas da scolas spezialisadas e professiunalas sco er da l’associaziun Schweizer Verband technischer Bühnen- und Veranstaltungsberufe svtb-astt

Pirotecnicist/ Pirotecnicista

Curs ed examens da l'IG Bühnenfeuerwerk (Associaziun svizra da pumpiers)

Examen professiunal (EP)

tecnicist / tecnicista d’occurrenzas  cun certificat professiunal federal
Actualmain na vegnan manads tras nagins examens professiunals

Scola spezialisada superiura (SSS)

studis en secturs spezials parentads

Scola auta spezialisada (SAS)

studis en secturs spezials parentads, p.ex. Bachelor of Science (SAS) en electrotecnica. Tut tenor scola auta spezialisada valan differentas cundiziuns d'admissiun.

Cundiziuns da lavur

Spezialists e spezialistas d’occurrenzas lavuran en teaters, locals d’occurrenzas, manaschis da producziun da film e televisiun, studios dal tun, firmas d’event, manaschis da construcziun per fieras u auters manaschis da la branscha d'occurrenzas. Els pon era lavurar sur sasez sco freelancer. En il manaschi da producziun ed event èsi cler ch’il temp da lavur è malregulà e ch’i dat era bler lavur durant la fin d’emna e la notg.

Ulteriuras infurmaziuns

Schweizer Verband technischer Bühnen- und Veranstaltungsberufe svtb-astt
URL: www.svt-astt.ch




orientamento.ch